4kNews कामोठे
पनवेल, दि.१ (वार्ताहर) : हिंदुहृदयसम्राट बाळासाहेब ठाकरे यांच्या जन्मशताब्दी वर्षानिमित्त शिवसेना (उद्धव बाळासाहेब ठाकरे) पक्षाच्या नवीन पनवेल शहर शाखेच्या वतीने ‘एसटी स्मार्ट कार्ड (एनसीएमसी)’ शिबिराचे आयोजन करण्यात आले. विभागप्रमुख यतिन देशमुख यांच्या नेतृत्वाखाली झालेल्या या शिबिराला सुमारे ४०० नागरिकांचा उत्स्फूर्त प्रतिसाद मिळाला. 

शिबिराचे उद्घाटन जिल्हाप्रमुख दीपक निकम यांच्या हस्ते झाले. ज्येष्ठ नागरिक, विद्यार्थी, नोकरदारांसह नागरिकांनी सकाळपासूनच नोंदणीसाठी गर्दी केली होती. तांत्रिक पथकाच्या मदतीने सुमारे ४०० नागरिकांची अर्ज प्रक्रिया व नोंदणी पूर्ण करण्यात आली.
एसटी स्मार्ट कार्डमुळे प्रवाशांना रोख रकमेऐवजी डिजिटल पद्धतीने व्यवहार करता येणार असून, प्रवास अधिक सुलभ होण्यास मदत होणार आहे. शिबिराच्या यशस्वी आयोजनासाठी पक्षाचे पदाधिकारी व कार्यकर्त्यांनी सहकार्य केले. नागरिकांनी या उपक्रमाचे कौतुक केले.