4kNews कामोठे दि. 16

पनवेल (प्रतिनिधी) : नवरात्रोत्सवाच्या पार्श्वभूमीवर पनवेल शहर वाहतूक शाखेने राबविलेल्या विशेष मोहिमेदरम्यान तिहेरी हत्याकांडातील पाहिजे असलेल्या आरोपीला ताब्यात घेण्यात आले. दीपक फतेसिंग सुरडकर (वय ४४, रा. सोमठाणा, ता. चिखली, जि. बुलढाणा) असे आरोपीचे नाव असून, त्याला पुढील कारवाईसाठी बुलढाणा पोलिसांच्या स्वाधीन करण्यात आले.

९ ऑक्टोबर रोजी सायंकाळी पनवेल एसटी स्टँड परिसरात वाहतूक पोलिसांनी विशेष मोहीम राबवली. यावेळी हाताला जखम झालेला एक संशयित आढळला. पोलीस निरीक्षक सुभाष पुजारी यांच्या मार्गदर्शनाखाली चौकशी केली असता, त्याने सुरुवातीला आपली ओळख सांगण्यास टाळाटाळ केली. पुढील विचारपुशीत त्याने जमिनीच्या वादातून आई सरस्वती (७५), भाऊ संजय (४८) आणि पुतण्या रजित (२१) यांची हत्या केल्याची माहिती दिली.

या माहितीची पडताळणी केल्यानंतर तो बुलढाणा येथील तिहेरी हत्याकांडातील आरोपी असल्याचे निष्पन्न झाले. त्यानंतर त्याला बुलढाणा पोलिसांच्या ताब्यात देण्यात आले. ही कारवाई पोलीस उपायुक्त डॉ. राहुल खाडे यांच्या आदेशानुसार करण्यात आली.