4kNews कामोठे
मुंबई, दि. 14(अजित मोहिते) : राष्ट्रीय डाक सप्ताह २०२६ अंतर्गत मुंबई जनरल पोस्ट ऑफिस (जीपीओ) येथे १२ ऑक्टोबर रोजी ‘फिलॅटली दिवस’ साजरा करण्यात आला. डाक तिकिटसंग्रहाची आवड विद्यार्थ्यांमध्ये आणि तरुणांमध्ये वाढविणे, तसेच तिकिटांच्या माध्यमातून भारताचा इतिहास, संस्कृती आणि नैसर्गिक वारशाची ओळख करून देणे हा या उपक्रमाचा उद्देश होता.
या निमित्ताने मुंबई जीपीओमध्ये विषयाधारित डाक तिकिटांचे प्रदर्शन भरविण्यात आले. तसेच शालेय विद्यार्थ्यांसाठी फिलॅटली ब्युरो भेट, प्रश्नमंजुषा आणि चित्रकला स्पर्धा आयोजित करण्यात आल्या. फिलॅटली तज्ज्ञांची व्याख्यानेही झाली. या उपक्रमांमुळे विद्यार्थ्यांना डाक तिकिटांचे ऐतिहासिक, सांस्कृतिक आणि शैक्षणिक महत्त्व जाणून घेण्याची संधी मिळाली.
कार्यक्रमात ‘भारतातील स्थलांतरित पक्षी मालिका–१’ या चित्रमय पोस्टकार्ड संचाचे प्रकाशन निसर्गप्रेमी दिवाकर देविदास ठोंबरे यांच्या सौजन्याने करण्यात आले. यावेळी फिलॅटली दिवसानिमित्त विशेष टपाल विरूपणाचेही अनावरण करण्यात आले. टपाल सेवा संचालक (मुख्यालय) सिमरन कौर, दिवाकर ठोंबरे आणि फिलॅटली तज्ज्ञ उपस्थित होते.
सिमरन कौर यांनी विद्यार्थ्यांचे व शाळा प्रशासनांचे अभिनंदन केले. फिलॅटली हा ‘छंदांचा राजा’ असून, त्यातून जिज्ञासा वाढते आणि ज्ञानाच्या कक्षा रुंदावतात, असे त्यांनी सांगितले. डाक तिकिटांमध्ये कला, संस्कृती, संगीत आणि निसर्गासह विविध विषयांचा समावेश असल्याने हा छंद ज्ञानवर्धक ठरतो, असेही त्यांनी नमूद केले.
महाराष्ट्रात स्थलांतरित होऊन येणाऱ्या पक्ष्यांची छायाचित्रे टिपून पोस्टकार्ड संच तयार केल्याबद्दल ठोंबरे यांचे कौतुक करण्यात आले. ही पोस्टकार्डे राज्यातील विविध फिलॅटली ब्युरोंमध्ये उपलब्ध आहेत. हस्तलिखित पत्रांचे भावनिक महत्त्व अधोरेखित करताना कौर यांनी पत्रलेखनामुळे भावना आणि कृतज्ञता मनापासून व्यक्त करता येते, असे सांगितले.
या कार्यक्रमातून डाक तिकिटसंग्रहाचा प्रसार, विद्यार्थ्यांमध्ये वाचन-जिज्ञासा वाढविणे आणि भारताच्या समृद्ध जैवविविधतेविषयी जनजागृती करण्याचा भारतीय डाक विभागाचा प्रयत्न अधोरेखित झाला.
