4,kNews कामोठे दि. 13
पनवेल : रोटरी क्लब पनवेल सनराईझतर्फे सुधागड एज्युकेशन सोसायटी माध्यमिक विद्यालय, कामोठे येथील दहावीच्या गरजू व गरीब विद्यार्थ्यांना ‘आयडियल स्टडी अॅप’चे मोफत वितरण करण्यात आले. या उपक्रमांतर्गत शाळेतील १०० विद्यार्थ्यांना या अॅपचा मोफत लाभ देण्यात आला.
दहावीच्या विद्यार्थ्यांना शाळा आणि घरच्या अभ्यासादरम्यान प्रभावी मार्गदर्शन मिळावे, या उद्देशाने या अॅपमध्ये विश्लेषणात्मक पाठ्यपुस्तक, प्रश्नोत्तरांचा सराव, सरावपत्रिका तसेच व्हिडिओच्या माध्यमातून तज्ज्ञांचे मार्गदर्शन यांचा समावेश करण्यात आला आहे. त्यामुळे विद्यार्थ्यांना अभ्यास अधिक सुलभ आणि परिणामकारक पद्धतीने करता येणार आहे.
यावेळी विद्यार्थ्यांचे पालक, शिक्षक, पर्यवेक्षक खेडकर सर, ठाकूर सर, प्राचार्य पालवे सर उपस्थित होते. रोटरी क्लबच्या वतीने डिस्ट्रिक्ट ३१३१चे असिस्टंट गव्हर्नर रतन खरोल, को-चेअर बाळकृष्ण आंबेकर आणि अध्यक्ष काशीराम पाटील यांनी विद्यार्थ्यांना मार्गदर्शन केले.
कार्यक्रमाची प्रस्तावना रो. गोरेगावकर यांनी केली, तर आभार प्रदर्शन रो. रमेश वायडांडे यांनी केले. गरजू विद्यार्थ्यांना डिजिटल शिक्षणाची सुविधा उपलब्ध करून देणाऱ्या या उपक्रमाचे उपस्थितांकडून कौतुक करण्यात आले.
