4kNews कामोठे
उरण, दि. २७ (विठ्ठल ममताबादे) : नागाव गोसपाडा (पिंपळआळी) येथील श्री बाबदेव मित्रमंडळाच्या समाजमंदिरातील पिलर जीर्ण झाल्याने इमारतीची अवस्था धोकादायक झाली होती. गणेशोत्सवाच्या पार्श्वभूमीवर संभाव्य धोका लक्षात घेऊन समाजमंदिराची तातडीने दुरुस्ती करण्याची मागणी मंडळाच्या पदाधिकाऱ्यांनी सामाजिक कार्यकर्ते वैभव यशवंत कडू यांच्याकडे केली.
परिस्थितीचे गांभीर्य लक्षात घेऊन नागाव-म्हातवली प्रकल्पग्रस्त संघटनेचे अध्यक्ष तसेच आई मांगीनदेवी पारंपरिक मच्छीमार सोसायटी, नागावचे चेअरमन वैभव कडू यांनी तत्काळ पुढाकार घेत दुरुस्तीचे काम हाती घेतले. दुरुस्तीचे काम वेळेत पूर्ण झाल्याने नागरिकांना दिलासा मिळाला असून, गणेशोत्सवादरम्यान निर्माण होणारा संभाव्य धोका टळला आहे.
सामाजिक बांधिलकीतून सहकार्य केल्याबद्दल श्री बाबदेव मित्रमंडळाच्या वतीने वैभव कडू यांचे आभार मानण्यात आले. या उपक्रमामुळे समाजमंदिराच्या सुरक्षिततेचा प्रश्न मार्गी लागला आहे.
