4kNews कामोठे
नवी मुंबई, दि. २५ (प्रतिनिधी) : नवी मुंबई गुन्हे शाखा (कक्ष-१, वाशी) पथकाने सोनसाखळी चोरीप्रकरणी दोन सराईत आरोपींना अटक करून ७ लाख ३९ हजार रुपयांचा मुद्देमाल जप्त केला आहे. आरोपींकडून सहा सोन्याच्या चेन आणि चोरीसाठी वापरलेली मोटारसायकल हस्तगत करण्यात आली.
खारघर पोलीस ठाण्यात दाखल झालेल्या सोनसाखळी चोरीच्या गुन्ह्याचा तपास करताना पोलिसांनी सीसीटीव्ही फुटेज आणि गुप्त माहितीच्या आधारे आरोपींचा माग काढला. त्यानंतर नौशाद मुस्ताक आलम ऊर्फ सागर (कामोठे) आणि प्रशांत राजू मगर ऊर्फ प्रशांत वाघमारे (कोपरखैरणे) यांना अटक करण्यात आली.
चौकशीत आरोपींनी खारघर, कोपरखैरणे आणि रबाळे परिसरातील आणखी पाच जबरी सोनसाखळी चोरीचे गुन्हे केल्याची कबुली दिली. दोघांविरुद्ध यापूर्वीही चोरी, घरफोडी आणि जबरी चोरीचे गुन्हे दाखल असल्याची माहिती तपासात समोर आली आहे.
पोलिसांनी आरोपींकडून सुमारे ६९.९५ ग्रॅम वजनाच्या सहा सोन्याच्या चेन तसेच होंडा शाइन मोटारसायकल जप्त केली असून, या प्रकरणाचा पुढील तपास गुन्हे शाखा कक्ष-१, वाशी करीत आहे.
