4kNews कामोठे
पनवेल, दि. 23(संजय कदम) : पनवेल परिमंडळ-३ मधील सात पोलीस ठाण्यांच्या पोलिसांनी चोरीच्या ४८ गुन्ह्यांची उकल करून १ कोटी २२ लाख ९४ हजार २६७ रुपये किमतीचा मुद्देमाल मूळ मालकांना परत केला. यामध्ये १४० मोबाईल फोन, १२९ ग्रॅम सोने, ४७ तोळे चांदी, आठ वाहने आणि १७ लाख ३४ हजार ७०० रुपयांच्या रोकडसह अन्य मौल्यवान वस्तूंचा समावेश आहे. या कारवाईमुळे नुकसान झालेल्या नागरिकांना मोठा दिलासा मिळाला आहे.
नवी मुंबई पोलीस आयुक्तालयाच्या परिमंडळ-३ अंतर्गत पनवेल शहर, पनवेल तालुका, खांदेश्वर, कामोठे, कळंबोली, खारघर आणि तळोजा या सात पोलीस ठाण्यांच्या हद्दीत चोरीचे गुन्हे दाखल झाले होते. संबंधित गुन्ह्यांचा तपास करून चोरीस गेलेल्या वस्तू शोधण्यात पोलिसांना यश आले.
पोलीस उपायुक्त, परिमंडळ-३ तसेच पनवेल व खारघर विभागांच्या सहायक पोलीस आयुक्तांच्या मार्गदर्शनाखाली ही कारवाई करण्यात आली. संबंधित पोलीस अधिकारी व कर्मचाऱ्यांच्या प्रयत्नांमुळे मोठ्या प्रमाणात मुद्देमाल हस्तगत करून तो तक्रारदारांना परत करणे शक्य झाले. या कामगिरीमुळे पोलिसांचे कौतुक होत असून, नागरिकांचा पोलिसांवरील विश्वास अधिक दृढ होण्यास मदत होणार आहे.
