4kNews कामोठे दि. 25
पनवेल : चंदेरी किल्ल्यावर ट्रेकिंगसाठी गेलेल्या तीन तरुणांचा डोंगरात रस्ता चुकल्याने ते भरकटले. मदतीसाठी त्यांनी ११२ क्रमांकावर संपर्क साधल्यानंतर पोलिसांनी तातडीने शोधमोहीम राबवून तिघांनाही सुखरूप गडाच्या पायथ्याशी आणले.
वावंजे बिट निर्भया एमडीटीवर सकाळी ११.०८ वाजता चंदेरी किल्ल्यावर काही जण अडकल्याची माहिती मिळाली. वरिष्ठ पोलीस निरीक्षक गजानन घाडगे व पोलीस निरीक्षक (गुन्हे) आनंद कांबळे यांच्या मार्गदर्शनाखाली पोलीस उपनिरीक्षक गणेश मोकाशी, पोलीस हवालदार अमर भालसिंग आणि पोलीस नाईक मिलिंद जाधव यांनी तातडीने घटनास्थळी धाव घेतली.
ओम खिलारी, पार्थ कडवे आणि रूषिल वृंदावन हे कामोठे, पनवेल येथील रहिवासी ट्रेकिंगसाठी चंदेरी किल्ल्यावर गेले होते. डोंगरातील वाट चुकल्याने त्यांनी ११२ वर मदत मागितली. त्यानंतर रिटघर गावचे पोलीस पाटील दीपक पाटील तसेच सह्याद्री प्रतिष्ठान पनवेलचे दुर्गसेवक गौरव दरवडा, मयूर टकले व आदेश पाडेकर यांच्या मदतीने शोधमोहीम सुरू करण्यात आली. काही वेळातच तिन्ही तरुणांचा शोध लागला. त्यांना सुरक्षितपणे गडाच्या पायथ्याशी आणून कुटुंबीयांशी संपर्क साधण्यात आला. पोलिसांच्या तत्परतेमुळे तिघेही सुखरूप बचावले.
