4kNews कामोठे
नवी मुंबई, दि.१ (वार्ताहर) : महामार्गालगतच्या शाळांमधील विद्यार्थ्यांच्या सुरक्षिततेसाठी नवी मुंबई वाहतूक पोलिसांच्या वतीने राबविण्यात येत असलेल्या ‘वन डे ट्रॅफिक कॉप्स’ उपक्रमाला नावडे येथील परशुराम जोमा म्हात्रे हायस्कूलच्या विद्यार्थ्यांचा उत्स्फूर्त प्रतिसाद मिळाला. सुमारे ५० आरएसपी विद्यार्थ्यांनी वाहतूक व्यवस्थापनात सहभाग घेतला. 

तळोजा वाहतूक शाखेच्या वतीने एनएच-४८ महामार्गालगत शाळेसमोर हा उपक्रम राबविण्यात आला. विद्यार्थ्यांना वाहतूक नियम, सिग्नलचे महत्त्व, सुरक्षितपणे रस्ता ओलांडणे तसेच पादचाऱ्यांना प्राधान्य देण्याबाबत मार्गदर्शन करण्यात आले.
विद्यार्थ्यांनी वाहतूक पोलिसांसोबत महामार्गावरील वाहतूक नियंत्रित करून शाळकरी मुलांना सुरक्षितपणे रस्ता ओलांडून देण्याचे प्रात्यक्षिक केले. या उपक्रमामुळे विद्यार्थ्यांना वाहतूक नियमांची प्रत्यक्ष माहिती मिळून रस्ते सुरक्षेबाबत जनजागृती झाली. पोलिस उपायुक्त डॉ. राहुल खाडे यांच्या मार्गदर्शनाखाली वरिष्ठ पोलीस निरीक्षक चेतना चौधरी व तळोजा वाहतूक शाखेच्या अंमलदारांनी उपक्रम यशस्वी केला.