4kNews कामोठे
उरण, दि.15 (विठ्ठल ममताबादे) : द्रोणागिरी, उरण येथील एस. एस. पाटील इंटरनॅशनल स्कूलमध्ये विद्यार्थ्यांमध्ये आग प्रतिबंधक उपाययोजनांबाबत जनजागृती करण्यासाठी फायर अवेअरनेस प्रोग्रामचे आयोजन करण्यात आले.
अग्निशमन विभागाचे उपअग्निशमन अधिकारी अमित कांबळी आणि लीडिंग फायरमन सागर साळुंके यांनी विद्यार्थ्यांना आगीची कारणे, संभाव्य धोके, आग लागल्यानंतर घ्यावयाची खबरदारी आणि विविध पद्धतीने आग विझविण्याबाबत मार्गदर्शन केले. यावेळी विद्यार्थ्यांना प्रत्यक्ष प्रात्यक्षिकाद्वारे आग प्रतिबंधक उपाययोजनांची माहिती देण्यात आली.
आपत्कालीन परिस्थितीत घाबरून न जाता स्वतःचा बचाव करताना इतरांच्या सुरक्षिततेची काळजी कशी घ्यावी, याबाबतही विद्यार्थ्यांना मार्गदर्शन करण्यात आले.
कार्यक्रमास स्कूलच्या सल्लागार स्वातीताई म्हात्रे, मुख्याध्यापिका मृदुला धोंडी, सहसचिव किरण घरत, रायगड जिल्हा क्रिकेट असोसिएशनचे उपाध्यक्ष राजेश पाटील, शिवछत्रपती पुरस्कारप्राप्त सूर्यकांत ठाकूर, जेएनपीटी कर्मचारी संदीप पाटील यांच्यासह शिक्षक, कर्मचारी व पालक उपस्थित होते.
विद्यार्थ्यांनी कार्यक्रमात उत्स्फूर्त सहभाग घेतला. प्रत्यक्ष प्रात्यक्षिकांमुळे आगीच्या प्रसंगी घ्यावयाच्या सुरक्षिततेच्या उपाययोजनांची विद्यार्थ्यांना प्रभावी माहिती मिळाली.
आग लागल्यास नागरिकांनी तातडीने अग्निशमन विभागाशी ८१०४९६१९४१ किंवा ०२२-६९३६५६०० या क्रमांकांवर संपर्क साधावा, असे आवाहन करण्यात आले.
