पनवेल दि.१५(संजय कदम): पनवेल शहर पोलिसांनी सराईत ऑटो रिक्षा चोरणाऱ्या आरोपीला अटक करून १२ लाख ४५ हजार रुपये किमतीच्या १८ रिक्षा बुलढाणा येथून जप्त करण्यात यश आले आहे. मुख्य मंझे हा रिक्षा चालवत असतानाच चोरीच्या रिक्षा हेरून तो त्या चोरी करत होता.
पनवेल शहर परिसरातील व आजुबाजुच्या पोलीस ठाणे परिसरात दिवसेंदिवस रिक्षा चोरीच्या गुन्हयांच्या वाढत्या घटनांच्या अनुषंगाने वरिष्ठांनी दिलेल्या सुचनांप्रमाणे गुन्हे प्रकटीकरण पथकामार्फत तांत्रिक तपास, सीसीटीव्ही फुटेज तपास, गुप्त बातमीदार व इतर प्रकारे शोध चालू असताना पनवेल शहर पोलीस ठाण्याचे गुन्हे प्रकटीकरण पथकाचे पोहवा नितीन वाघमारे, पोहवा महेंद्र वायकर व पोशि चंद्रशेखर चौधरी हे पोलीस ठाणे हददीमध्ये गस्त करत असताना गुन्हयाचे घटनास्थळावरील सीसीटीव्ही फुटेजमध्ये दिसणाऱ्या आरोपीशी साम्य असलेला संशयीत इसम दिसला. त्याला स्थानिक नागरीकांचे मदतीने ४ किलोमीटर पाठलाग करून ताब्यात घेवून विचारपूस केली.
यावेळी त्याने त्याचे नाव निसार सत्तार खान, (वय -३६ वर्ष, रा. कच्छी मोहल्ला, पनवेल) असल्याचे सांगितले. सदर इसमाकडे गुन्हयाचे अनुषंगाने विचारपुस केली असता त्याने पनवेल शहर पोलीस ठाणे दाखल असलेल्या गुन्ह्यातील ऑटो रिक्षा चोरी केल्याचे कबुल केले. नमुद आरोपीकडे कौशल्यपुर्ण अधिक तपास केला असता आरोपीने सदर गुन्हयातील तसेच पनवेल शहर, कळंबोली, कामोठे पोलीस ठाण्याच्या परीसरातुन देखील सुमारे १ वर्षापासून १८ ऑटो रिक्षा चोरी केल्याचे कबुल करून सदर ऑटो रिक्षा या त्याने बुलढाणा जिल्ह्यातील मेहकर तालुका येथे विक्री केल्याचे सांगितल्याने. या आरोपीला अटक करून त्याने दिलेल्या माहीतीची शहानिशा करण्याकरीता बुलढाणा पोलीस पथक रवाना करण्यात आले होते. पनवेल शहर पोलीस ठाण्याचे पोलीस पथकाने तालुका मेहकर जिल्हा बुलढाणा येथे जावुन स्थानिक पोलीसांचे मदतीने विविध गुन्हयातील तब्बत १८ ऑटो रिक्षा ताब्यात घेवून त्याचा अभिलेख तपासला असता मिळालेल्या रिक्षापैकी १० ऑटो रिक्षा या पनवेल शहर पोलीस ठाण्याकडील गुन्हयातील, ४ ऑटो रिक्षा कळंबोली पोलीस ठाण्याकडील दाखल गुन्हयातील आणि ३ ऑटो रिक्षा या कामोठे पोलीस ठाणे कडील दाखल गुन्हयातील असल्याचे निष्पन्न झाले.
एका ऑटो रिक्षावरील इंजिन नंबर व चेसिस नंबर खोडण्यात आल्याने या रिक्षाबाबत अद्यापपर्यंत उपयुक्त माहिती प्राप्त झालेली नाही. अश्या प्रकारे कौशल्यपूर्ण तपस करून नवी मुंबई आयुक्तालयातील सुमारे १२ लाख ४५ हजार रूपये किंमीसमा १८ रिक्षा जप्त करण्यात आल्या असून १७ ऑटो रिक्षा चोरीचे गुन्हे उघडकीस आणण्यास पनवेल पोलीसांना यश मिळाले आहे. सदर कामगिरी पनवेल शहर पोलीस ठाण्याचे वरिष्ठ पोलीस निरीक्षक नितीन ठाकरे, पोलीस निरीक्षक (गुन्हे) शाकिर पटेल, पोलीस निरीक्षक (प्रशासन) अभिजीत अभंग, पनवेल शहर पोलीस ठाणे गुन्हे पकटीकरण पथकातील सपोनि प्रकाश पवार, पोउपनि विनोद लभडे, पोलीस हवालदार यशवंत झांझम, अविनाश गंथडे, नितीन वाघमारे, परेश म्हात्रे, अमोल डोईफोडे, महेंद्र वायकर, महेश पाटील, अमोल पाटील, संदेश म्हात्रे, तुषार बोरसे, किरण सोनावणे, लक्ष्मण कटक (मेहकर पोलीस ठाणे), पोलीस नाईक विनोद देशमुख, मिथुन भोसले, पोलीस शिपाई किरण कराड, चंद्रशेखर चौधरी, विशाल दुधे यांनी केली आहे.
