4kNews कामोठे दि. 17
न्यू पनवेल, रुधिरसेतू सेवा संस्था, श्री वर्धमान स्थानकवासी जैन श्रावक संघ (मेवाड) उपसंघ पनवेल, इनर व्हील क्लब पनवेल सिटी आणि राजस्थानी महिला मंडळ-पनवेल यांच्या संयुक्त विद्यमाने जैन स्थानक, साधना सदन, विश्राळी नाका येथे भव्य दि. १५ ऑगस्ट २०२६ रक्तदान शिबिराचे आयोजन करण्यात आले. या शिबिराला समाजबांधवांचा उत्स्फूर्त प्रतिसाद मिळाला असून १०८ रक्तदात्यांनी स्वेच्छेने रक्तदान केले.
रक्तदानासोबतच शिबिरात रक्तगट, हिमोग्लोबिन, रक्तदाब आणि रक्तातील साखर तपासणी अशा विविध मोफत आरोग्य तपासण्या करण्यात आल्या. गरजू रुग्णांना जीवनदान देण्याच्या उद्देशाने आयोजित या उपक्रमातून सामाजिक बांधिलकीचे दर्शन घडले.
शिबिराच्या यशस्वी आयोजनासाठी रुधिरसेतू सेवा संस्थेचे सुरेश रिसबूड, योगेश जोशी, सुनंदा कोठारी, मनीषा बोरा, सुवर्णा भंडारी, धनश्री बांठिया, नरेंद्रकुमार दसरे, उन्मेष लोहार, सानिका मराठे, माधुरी लोहार व साम्य लोहार यांनी विशेष परिश्रम घेतले. तसेच इनर व्हील क्लब पनवेल सिटीच्या प्रेसिडेंट स्नेहल कल्याणकर, सेक्रेटरी विजेता कोठारी, कोषाध्यक्ष ध्वनी तन्ना यांच्यासह प्रतिभा डांगी, रीना गुंडेचा, शुभांगी दीक्षित, अर्चना परेश ठाकूर, जयश्री मंगलानी आणि नम्रता बांठिया यांनी सहकार्य केले.
रुधिरसेतू सेवा संस्थेने सर्व रक्तदाते, स्वयंसेवक आणि सहकार्य करणाऱ्या संस्थांचे आभार मानले. ‘रक्तदान हेच श्रेष्ठ जीवनदान’ हा संदेश समाजात पोहोचवत युवकांनीही अशा सामाजिक उपक्रमांमध्ये सातत्याने सहभागी व्हावे, असे आवाहन संस्थेच्या वतीने करण्यात आले.
