4kNews कामोठे
नवी मुंबई, दि. 10 सप्टेंबर (अजित मोहिते) : कर्करोगावरील उपचार ठरवताना रुग्णाचे केवळ वय न पाहता त्याची शारीरिक क्षमता, स्वावलंबन, पोषणस्थिती, मानसिक आरोग्य, इतर आजार, औषधांचा भार आणि कौटुंबिक आधार यांचा विचार करणे आवश्यक असल्याचे मत अपोलो हॉस्पिटल्स नवी मुंबईतील तज्ज्ञांनी व्यक्त केले. ज्येष्ठ नागरिकांमध्ये कर्करोग उपचारांची वाढती गरज लक्षात घेऊन अपोलो हॉस्पिटल्सने ज्येष्ठांसाठी विशेष कर्करोग चिकित्सा क्लिनिक सुरू केले आहे.
भारतातील कर्करोग रुग्णांपैकी जवळपास निम्मे रुग्ण ६० वर्षांवरील असल्याचा अंदाज आहे. त्यामुळे ज्येष्ठ रुग्णांसाठी स्वतंत्र आणि वैयक्तिक उपचार पद्धतीची गरज वाढत आहे. एकाच वयाचे आणि एकाच प्रकारच्या कर्करोगाने ग्रस्त असलेल्या दोन रुग्णांची उपचार सहन करण्याची क्षमता मात्र वेगवेगळी असू शकते. त्यामुळे उपचाराचा निर्णय केवळ वयाच्या आधारावर घेणे योग्य नसल्याचे तज्ज्ञांचे म्हणणे आहे.
अपोलो हॉस्पिटल्स नवी मुंबईच्या मेडिकल अँड प्रिसिजन ऑन्कोलॉजी विभागाचे प्रोफेसर व लीड कन्सल्टंट डॉ. तेजिंदर सिंह यांनी सांगितले की, त्यांच्या विभागात उपचार घेणाऱ्या कर्करोग रुग्णांपैकी सुमारे एक तृतीयांश रुग्ण ६० वर्षांवरील आहेत. ज्येष्ठ रुग्णांसाठी उपचारांची एकच पद्धत लागू करता येत नाही. कीमोथेरपी, इम्युनोथेरपी, टार्गेटेड थेरपी किंवा शस्त्रक्रिया यासाठी रुग्णाची एकूण शारीरिक स्थिती आणि उपचार सहन करण्याची क्षमता तपासणे आवश्यक आहे.
जेरियाट्रिक मेडिसिन कन्सल्टंट डॉ. सायली दामले यांनी सांगितले की, जेरियाट्रिक ऑन्कोलॉजीचा उद्देश ज्येष्ठांना कमी उपचार देणे नसून योग्य रुग्णाला योग्य प्रमाणात उपचार देणे हा आहे. सविस्तर आरोग्य मूल्यांकनातून संभाव्य धोके ओळखून त्यावर वेळीच उपाय करता येतात आणि रुग्णासाठी अधिक सुरक्षित व वैयक्तिक उपचार योजना तयार करता येते.
या विशेष क्लिनिकमध्ये मेडिकल ऑन्कोलॉजिस्ट, जेरियाट्रिशियन, आहारतज्ज्ञ, फिजिओथेरपिस्ट, मानसोपचारतज्ज्ञ आणि अन्य तज्ज्ञांची बहुविशेषज्ञ टीम एकत्रितपणे काम करणार आहे. निदानापासून उपचार, पोषण सहाय्य, शारीरिक पुनर्वसन आणि उपचारानंतरच्या पाठपुराव्यापर्यंत रुग्णाला समन्वित सेवा देण्याचा या उपक्रमाचा उद्देश आहे.
ज्येष्ठ नागरिकांमधील कर्करोग उपचारांबाबतचे गैरसमज दूर करणे, तसेच रुग्णाची सुरक्षितता, स्वावलंबन, आराम आणि जीवनाची गुणवत्ता यांचा समतोल साधणे, यावर या क्लिनिकमध्ये भर दिला जाणार आहे.
