4kNews कामोठे
पनवेल, दि. 22 (वार्ताहर) : पनवेल महानगरपालिकेच्या वतीने दि. २३ ऑगस्ट २०२६ रोजी आयोजित करण्यात आलेल्या ‘मेयर मॅरेथॉन’च्या आयोजनात गंभीर अनियमितता, नियमभंग आणि आर्थिक पारदर्शकतेचा अभाव असल्याचा आरोप शिवसेना (उद्धव बाळासाहेब ठाकरे) पक्षाच्या गटनेत्या तथा नगरसेविका लीना अर्जुन गरड यांनी केला आहे. या संपूर्ण प्रकरणाची उच्चस्तरीय स्वतंत्र चौकशी करून दोषींवर नियमानुसार कारवाई करावी, अशी मागणी त्यांनी महापालिका आयुक्त व महापौरांकडे निवेदनाद्वारे केली आहे.
महापालिकेच्या सर्वसाधारण महासभेची मान्यता न घेता मॅरेथॉनचे आयोजन करण्यात आल्याचा दावा गरड यांनी केला आहे. तसेच मॅरेथॉनच्या आयोजनासाठी खाजगी संस्थेची निवड टेंडर प्रक्रियेविना करण्यात आल्याचा आरोपही त्यांनी केला आहे. दोन लाख रुपयांपेक्षा अधिक खर्चाच्या कामांसाठी नियमानुसार निविदा प्रक्रिया राबविणे आवश्यक असल्याचे त्यांनी निवेदनात नमूद केले आहे.
मॅरेथॉनच्या ‘प्रवर्तक’ पदावर आमदाराचे भाऊ परेश ठाकूर, स्वीकृत नगरसेवक, यांची नियुक्ती करण्यात आल्याचा दावा करत गरड यांनी या नियुक्तीच्या प्रक्रियेवरही प्रश्न उपस्थित केला आहे. महापौर, उपमहापौर, स्थायी समिती अध्यक्ष किंवा प्रभाग समिती अध्यक्ष यांसारखे अधिकृत पद नसताना संबंधित व्यक्तीची प्रवर्तक म्हणून नियुक्ती कोणत्या अधिकाराने करण्यात आली, याचे स्पष्टीकरण देण्याची मागणी त्यांनी केली आहे.
महापालिकेच्या सर्वसाधारण महासभेसह स्थायी समिती, प्रभाग समिती तसेच महिला व बालकल्याण समितीची मान्यता घेण्यात आली आहे का, याबाबतही स्पष्टता आवश्यक असल्याचे गरड यांनी म्हटले आहे.
मॅरेथॉनमध्ये सहभागी होणाऱ्या खेळाडूंकडून प्रवेश शुल्क आकारले जात असून, हा निधी थेट खाजगी संस्थेकडे जात असल्याचा आरोप करण्यात आला आहे. या शुल्काची एकूण रक्कम, त्याचा हिशेब, खर्चाची पद्धत आणि महापालिकेच्या निधीशी त्याचा संबंध याबाबत पारदर्शकता नसल्याचे गरड यांनी निवेदनात नमूद केले आहे.
या संपूर्ण प्रकरणाची उच्चस्तरीय स्वतंत्र चौकशी करून टेंडरशिवाय खाजगी संस्थेची निवड का करण्यात आली, अपात्र व्यक्तींना प्रवर्तक पद का देण्यात आले आणि प्रवेश शुल्काचा आर्थिक व्यवहार नेमका कसा झाला, याचा अहवाल सार्वजनिक करावा, अशी मागणी करण्यात आली आहे.
तसेच प्रवेश शुल्काची संपूर्ण आर्थिक माहिती जाहीर करून संबंधित रक्कम महापालिका निधीत जमा करावी आणि चौकशीत दोषी आढळणाऱ्या अधिकारी व कर्मचाऱ्यांवर नियमानुसार कारवाई करावी, अशी मागणी लीना गरड यांनी केली आहे.
