4kanews कामोठे दि. 18
पनवेल (प्रतिनिधी) लोकमान्य बाळ गंगाधर टिळक यांनी सुरू केलेल्या सार्वजनिक गणेशोत्सवाच्या परंपरेचा आणि सांस्कृतिक वारशाचा गेल्या ६५ वर्षांपासून अखंड जागर करणाऱ्या पनवेल येथील श्री. मदन कोळी परिवाराच्या गणेशोत्सवाला यंदाही भक्ती आणि कलात्मकतेची अनोखी जोड लाभली आहे. दरवर्षी आपल्या आकर्षक व वैविध्यपूर्ण देखाव्यांमधून गणेशभक्तांचे लक्ष वेधून घेणाऱ्या कोळी परिवाराने यंदा ‘श्री नरसिंह अवतार’ हा देखावा साकारला असून, तो भाविकांच्या आकर्षणाचा केंद्रबिंदू ठरत आहे. 

हजारो भाविकांचे श्रद्धास्थान असलेल्या श्री. मदन कोळी परिवाराच्या गणेशमूर्तीची आकर्षक सजावट श्री साई आर्ट्स, कल्याण, रमेश जाधव आणि गणेश जाधव यांनी साकारली आहे. देखाव्याला भावपूर्ण आणि कलात्मक रूप देण्यासाठी पडदा पेंटिंग रमेश डुकरे, तर निवेदनाची जबाबदारी अॅड. प्रथमेश सोमण आणि अथर्व गोडबोले यांनी सांभाळली आहे. देखाव्याची भव्यता अधिक खुलविणारी आकर्षक रोषणाई नवीन पनवेल येथील जनार्दन केणी आणि सुरज भोईर यांनी साकारली आहे.भक्ती, कलात्मकता आणि सामाजिक प्रबोधन यांचा सुंदर संगम साधणारा हा ‘श्री नरसिंह अवतार’ देखावा गणेशभक्तांना आध्यात्मिक अनुभूती देत असून, परिसरातील भाविक मोठ्या संख्येने या देखाव्याला भेट देत आहेत.