4kNews कामोठे दि 18
पनवेल प्रतिनिधी
पर्यावरण संवर्धन आणि शाश्वत विकासासाठी कटिबद्ध असणाऱ्या Re Sustainability Limited च्या वतीने यंदा “पर्यावरणपूरक ग्रीन गणेशोत्सव – २०२६” या विशेष उपक्रमाचे आयोजन करण्यात आले आहे. कंपनीचे संचालक सोमनाथ मलगर यांच्या संकल्पनेतून आणि मार्गदर्शनाखाली या उपक्रमांतर्गत तब्बल ५,००० पर्यावरणपूरक श्री गणेशमूर्तींचे मोफत वितरण करण्यात येत आहे.
गणेशोत्सव हा महाराष्ट्राच्या सांस्कृतिक परंपरेचा पावन सोहळा आहे. हा सण भक्तिभावाने साजरा करतानाच पर्यावरणाचे रक्षण करणे ही काळाची गरज ओळखून संचालक सोमनाथ मलगर यांच्या नेतृत्वाखाली Re Sustainability Limited ने हा सामाजिक उपक्रम हाती घेतला आहे. या अंतर्गत कंपनीचे कर्मचारी, गृहनिर्माण संस्थांचे सभासद, शासकीय अधिकारी व नागरिकांना मोफत मूर्ती वाटप केले जात आहे. पनवेल महानगर पालिकेचे उपायुक्त गणेश शेटे ,सभागृह नेते प्रकाश बीनेदार , विरोधी पक्ष नेते अरविंद म्हात्रे यांच्यासह पनवेल महानगर पालिकेच्या कर्मचारी वर्गाला श्री मूर्ती देण्यात आल्या यावेळी एच आर हेड संदीप महाजन , सी एस आर हेडसतेज धीवर ,सेफ्टी हेड रामदास गोल्हार उपस्थित होते
प्लास्टर ऑफ पॅरिस (PoP) च्या मूर्ती व रासायनिक रंगांमुळे होणारे जलप्रदूषण टाळण्यासाठी या मूर्ती नैसर्गिक माती, कोकोपीट, बियाणे व कंपोस्टपासून तयार करण्यात आल्या आहेत. विसर्जनानंतर या मूर्ती कुंडीत विसर्जित केल्यास त्यातून नवीन रोपाची निर्मिती होते.
“पर्यावरणाचे संरक्षण ही केवळ आपली जबाबदारी नसून भावी पिढ्यांप्रती आपले कर्तव्य आहे,” असा संदेश देत संचालक सोमनाथ मलगर व Re Sustainability Limited ने सर्व नागरिकांना यंदाचा गणेशोत्सव पर्यावरणपूरक पद्धतीने साजरा करण्याचे आवाहन केले आहे.
