4kNews कामोठे दि. 5
पनवेल (प्रतिनिधी) : दिव्यांग बांधवांच्या हक्कांसाठी, विकासासाठी आणि सक्षमीकरणासाठी सातत्याने कार्य करणारे सामाजिक कार्यकर्ते साईनाथ पवार यांना त्यांच्या उल्लेखनीय कार्याबद्दल लुइझियाना रिसर्च युनिव्हर्सिटीच्या वतीने दिव्यांग क्षेत्रातील मानद डॉक्टरेट पदवी प्रदान करण्यात आली. पुणे येथे आयोजित कार्यक्रमात त्यांना हा सन्मान देण्यात आला. 

विशेष म्हणजे, साईनाथ पवार हे स्वतः दिव्यांग असूनही त्यांनी शारीरिक मर्यादांवर मात करत अनेक वर्षांपासून दिव्यांग बांधवांच्या समस्या सोडविण्यासाठी आणि त्यांना समाजाच्या मुख्य प्रवाहात आणण्यासाठी काम केले आहे. दिव्यांगांना मार्गदर्शन, शैक्षणिक संधी आणि प्रशिक्षण उपक्रमांच्या माध्यमातून त्यांनी योगदान दिले आहे.

याच सामाजिक कार्याची दखल घेत भारतीय अवॉर्ड कौन्सिलच्या वतीने त्यांना पुणे येथे ‘महाराष्ट्र भूषण’ पुरस्कारानेही सन्मानित करण्यात आले. त्यांच्या या दुहेरी सन्मानाबद्दल दिव्यांग बांधव, सामाजिक कार्यकर्ते आणि हितचिंतकांकडून अभिनंदन होत आहे.