4kNews कामोठे दि. 10
पनवेल (प्रतिनिधी) : उरण विधानसभा मतदारसंघातील करंजा परिसराच्या विकासासाठी १८० कोटी रुपयांचा निधी उपलब्ध होणार असून, या निधीतून प्रस्तावित विविध विकासकामांचे नियोजन व अंमलबजावणीबाबत करंजा सोसायटी येथे बैठक घेण्यात आली. आमदार महेश बालदी यांच्या प्रमुख उपस्थितीत झालेल्या बैठकीला मत्स्यपालन विभागाचे अधिकारी, करंजा सोसायटीचे पदाधिकारी आणि मच्छीमार बांधव उपस्थित होते.
करंजा परिसरातील मच्छीमारांच्या व्यवसायाशी संबंधित अडचणी, पायाभूत सुविधा आणि भविष्यातील गरजा लक्षात घेऊन विकासकामांना प्राधान्य देण्यात येणार आहे. बैठकीत स्थानिक नागरिकांच्या समस्या व सूचनाही जाणून घेण्यात आल्या. प्रस्तावित कामांना पुढील तीन महिन्यांत प्रत्यक्ष सुरुवात होणार असून, कामे नियोजनबद्ध व वेळेत पूर्ण करण्यासाठी संबंधित विभागांशी समन्वय साधला जात असल्याचे सांगण्यात आले. .
“मच्छीमार बांधवांचे हित आणि उरणचा सर्वांगीण विकास हेच आमचे प्राधान्य आहे. १८० कोटींच्या निधीतून करंजा परिसराच्या विकासाला नवी दिशा मिळेल. कामे केवळ कागदावर न राहता वेळेत पूर्ण करण्यासाठी आम्ही कटिबद्ध आहोत,” असे आमदार महेश बालदी यांनी सांगितले. बैठकीस जयविंद्र कोळी, नारायण नाखवा, राजेश नाखवा, भारत नाखवा, सागर नाखवा, शिवदास कोळी यांच्यासह मच्छीमार बांधव, पदाधिकारी व संबंधित अधिकारी उपस्थित होते.
