‘
4kNews कामोठे दि. 10
पनवेल (प्रतिनिधी) : भारतीय शास्त्रीय संगीत, नृत्य, भक्तिसंगीत आणि संस्कृतीच्या समृद्ध परंपरेचा सुरेल आविष्कार घडविणारा ‘मेहफिल-ए-अनुराग’ हा ‘संस्कृतीर दिशारी’चा तिसरा भव्य सांस्कृतिक सोहळा खारघर येथे उत्साहपूर्ण वातावरणात पार पडला. गायन, कथक नृत्य, तालवाद्यांची साथ आणि भक्तिसंगीताने सजलेल्या या मैफलीने रसिकांना मंत्रमुग्ध केले.
कार्यक्रमात पं. तुषार चॅटर्जी, रंजना चॅटर्जी व सौर्यादीप चॅटर्जी यांनी राग मुलतानी आणि ‘चलो मन गंगा यमुना तीर’ सादर करून मैफलीची सुरेल सुरुवात केली. सुप्रसिद्ध शास्त्रीय गायक पं. उमेश चौधरी यांनी राग पुरिया धनश्री, तराणा आणि मराठी अभंग सादर करत शास्त्रीय संगीत व भक्तिपरंपरेचा सुंदर मिलाफ घडविला.
विदुषी सुरंजना बोस यांनी राग रागेश्री, ठुमरी, कजरी व रागप्रधान रचना सादर करून रसिकांची दाद मिळवली. मोंद्रिता चॅटर्जी यांनी कृष्ण वंदना व तराण्याच्या माध्यमातून कथक नृत्याचे बहारदार सादरीकरण केले. कार्यक्रमाचा समारोप पं. प्रताप पाटील व त्यांच्या संचाने पखावजावर सादर केलेल्या शिव तांडवाने झाला.
तबला, हार्मोनियम व मंजीरा यांच्या प्रभावी साथसंगतीने संपूर्ण कार्यक्रम अधिक रंगतदार झाला. सूत्रसंचालन मोहर भट्टाचार्य यांनी केले.
यावेळी ह.भ.प. भजन पंडित निवृत्तीबुवा चौधरी, वसंत शेठ पाटील, भाजप जिल्हा चिटणीस ब्रिजेश पटेल, पियुष शहा, सिडको युनियनचे माजी अध्यक्ष जे. टी. पाटील, एमआयडीसीचे कार्यकारी अभियंता सुभाष कुंभार यांच्यासह मान्यवर व रसिक मोठ्या संख्येने उपस्थित होते. ‘संस्कृतीर दिशारी’च्या माध्यमातून भारतीय शास्त्रीय संगीत व सांस्कृतिक वारसा नव्या पिढीपर्यंत पोहोचविण्याचा प्रयत्न केला जात असून, ‘मेहफिल-ए-अनुराग’ हा त्याच सांस्कृतिक प्रवासातील महत्त्वपूर्ण टप्पा ठरला.
