4kNews कामोठे दि 10
पनवेल : पनवेल महानगरपालिकेच्या १०३ कामांच्या निविदांमध्ये अंदाजपत्रकीय किमतीपेक्षा तब्बल ६५ ते ७० टक्क्यांपर्यंत कमी दराने निविदा प्राप्त झाल्याची बाब समोर आली आहे. एवढ्या कमी दरात कामे करताना साहित्याचा दर्जा, मजुरी, यंत्रसामग्री, वाहतूक व इतर खर्च कसा भागविला जाणार, असा प्रश्न उपस्थित होत आहे.
शिवसेना उपजिल्हाप्रमुख भरत पाटील यांनी याप्रकरणी महापालिका प्रशासनाला निवेदन देऊन प्रत्येक अत्यल्प दराच्या निविदेचे स्वतंत्र दर-न्याय्यीकरण (Justification) आणि Item-wise Rate Analysis तपासल्याशिवाय अंतिम मंजुरी देऊ नये, अशी मागणी केली आहे.
संबंधित ठेकेदारांकडून खर्चाचे विवरण, तांत्रिक व आर्थिक क्षमता तसेच पूर्वी केलेल्या कामांची गुणवत्ता तपासण्यात यावी. दर-न्याय्यीकरण समाधानकारक नसल्यास केवळ कमी दराच्या आधारावर निविदा मंजूर करू नये, अन्यथा सार्वजनिक निधीतून निकृष्ट दर्जाची कामे होण्याचा धोका असल्याचे पाटील यांनी म्हटले आहे.
तसेच काम सुरू झाल्यानंतर प्रत्येक महत्त्वाच्या टप्प्यावर प्रत्यक्ष तांत्रिक पाहणी, साहित्याची गुणवत्ता तपासणी व आवश्यक प्रयोगशाळा चाचण्या घेण्यात याव्यात. दोष आढळल्यास संबंधित ठेकेदारांसह जबाबदार अधिकारी-कर्मचाऱ्यांवरही कारवाई करावी, अशी मागणी करण्यात आली आहे.
१०३ निविदांमध्ये एवढ्या मोठ्या प्रमाणात कमी दर कसे निश्चित झाले, ठेकेदारांनी कोणते दर-न्याय्यीकरण सादर केले आणि तांत्रिक समितीने कोणती तपासणी केली, याची माहिती पारदर्शकपणे सार्वजनिक करावी, अशी मागणीही करण्यात आली आहे. निवेदनाची प्रत दक्षता व गुण नियंत्रण मंडळाकडेही सादर करण्यात आली आहे.
