4kNews कामोठे n
लघु बंधारे, जलस्रोतांच्या पुनरुज्जीवनासह पशुधनासाठी पाण्याची व्यवस्था करण्याची मागणी
पनवेल, दि. 25 (वार्ताहर) : पनवेल तालुक्यात संभाव्य पाणीटंचाई रोखण्यासाठी प्रशासनाने आतापासूनच उपाययोजना कराव्यात, अशी मागणी शिवसेना (उद्धव बाळासाहेब ठाकरे) पक्षाचे उपजिल्हाप्रमुख भरत पाटील यांनी रायगडचे जिल्हाधिकारी किशन जावळे यांच्याकडे निवेदनाद्वारे केली आहे.
तालुक्यातील नद्या, ओढे, तलाव आणि विहिरींची पाहणी करून लघु बंधारे उभारावेत, जुन्या बंधाऱ्यांची दुरुस्ती करावी, तलावांतील गाळ काढावा आणि भूजल पुनर्भरणाची कामे हाती घ्यावीत, अशी मागणी त्यांनी केली.
संभाव्य पाणीटंचाईच्या काळात पशुधनासाठी पाणी व चाऱ्याची व्यवस्था, टँकरद्वारे पाणीपुरवठ्याचे नियोजन आणि शेतकऱ्यांना कमी पाण्यात येणाऱ्या पिकांबाबत मार्गदर्शन करावे, असेही त्यांनी सुचविले आहे.
महसूल, कृषी, जलसंधारण विभाग, ग्रामपंचायती आणि पनवेल महानगरपालिकेने समन्वयाने काम करावे. निवेदन मिळाल्यानंतर १५ दिवसांत प्राथमिक पाहणी करून संभाव्य टंचाईग्रस्त क्षेत्रांची नोंद करावी आणि कालबद्ध कृती आराखडा तयार करावा, अशी मागणी पाटील यांनी केली. पाणीटंचाई निर्माण होण्याची वाट न पाहता प्रशासनाने वेळीच ठोस उपाययोजना कराव्यात, असे आवाहनही त्यांनी केले.
