4kNews कामोठे
उरण, दि. ३१ (विठ्ठल ममताबादे) : खोपटे येथील मास्टर मरीन मेहर यार्ड कंपनीत स्थानिक बेरोजगारांना रोजगार मिळावा आणि प्रकल्पग्रस्त शेतकऱ्यांना रोजगार व व्यवसायाच्या संधी उपलब्ध करून द्याव्यात, या मागणीसाठी सुरू असलेले गेट बंद आंदोलन तिसऱ्या दिवशी स्थगित करण्यात आले. सामाजिक कार्यकर्ते अजित कृष्णा म्हात्रे यांच्या नेतृत्वाखाली २९ ऑक्टोबरपासून हे आंदोलन सुरू होते.
आंदोलनाची दखल घेत कंपनी प्रशासनाने १९ स्थानिक प्रकल्पग्रस्त बेरोजगारांना कामावर घेण्याचे मान्य केले आहे. त्यापैकी १० जणांना दोन दिवसांत, तर उर्वरित नऊ जणांना नोव्हेंबर महिन्यात कामावर घेण्यात येणार असल्याचे आश्वासन देण्यात आले. या निर्णयानंतर आंदोलकांनी आनंद व्यक्त केला.
मोठेखार (वरचा भाग) प्रकल्पग्रस्त शेतकरी संघटना, खोपटे-बांधपाडा यांच्या माध्यमातून हे आंदोलन करण्यात आले. पहिल्या दोन दिवसांत तोडगा न निघाल्याने आंदोलकांनी आंदोलन सुरू ठेवले होते. अखेर तिसऱ्या दिवशी मागण्यांबाबत सकारात्मक निर्णय झाल्याने आंदोलन स्थगित करण्यात आले.
या आंदोलनाला आमदार महेश बालदी, माजी आमदार मनोहरशेठ भोईर, भाजप युवा नेते प्रशांत ठाकूर, शिवसेना नेते बी. एन. डाकी, उरण नगराध्यक्ष भावनाताई घाणेकर, कामगार नेते रवी घरत, मनसे तालुकाध्यक्ष सत्यवान भगत यांच्यासह विविध राजकीय पक्षांचे नेते, पदाधिकारी आणि ग्रामस्थांनी पाठिंबा दिला.
दरम्यान, सर्व प्रकल्पग्रस्तांना रोजगाराच्या संधी मिळाल्या नाहीत, तर पुन्हा तीव्र आंदोलन छेडण्यात येईल, असा इशारा संघटनेने दिला आहे. आंदोलनाला पाठिंबा देणारे सर्व राजकीय पक्ष, सामाजिक संस्था, कार्यकर्ते, ग्रामस्थ तसेच ग्रामपंचायत बांधपाडा आणि ग्रामस्थ मंडळाचे संघटनेने आभार मानले आहेत.
