4kNews कामोठे दि. 31
पनवेल (प्रतिनिधी) : तळोजा औद्योगिक क्षेत्रातील शेल इंडिया कंपनीमध्ये कार्यरत सफाई कामगारांना दरमहा १३ हजार रुपयांची पगारवाढ मिळणार आहे. भाजपचे महाराष्ट्र प्रदेश चिटणीस आमदार प्रशांत ठाकूर यांच्या मार्गदर्शनाखाली आणि जय भारतीय जनरल कामगार संघटनेचे अध्यक्ष जितेंद्र घरत यांच्या नेतृत्वाखाली झालेल्या करारामुळे कामगारांना वेतनवाढीसह विविध सुविधा मिळणार आहेत.
करारानुसार, प्रत्येक कामगाराला तीन लाख रुपयांचे वैद्यकीय विमा संरक्षण देण्यात येणार आहे. तसेच सणासुदीसाठी १० हजार रुपये आगाऊ रक्कम, आपत्कालीन परिस्थितीत २० हजार रुपयांपर्यंत आर्थिक मदत आणि पूर्ण पगाराच्या आधारे बोनस देण्याची तरतूद करण्यात आली आहे.
आमदार प्रशांत ठाकूर यांच्या प्रमुख उपस्थितीत कराराची प्रक्रिया पार पडली. यावेळी संघटनेचे अध्यक्ष जितेंद्र घरत, कंपनीचे प्लांट मॅनेजर सचिन गुप्ता, लीडरशिप टीमचे सदस्य विनीत कश्यप, ठेकेदार आशिष मोकल, शेखर सावंत, विद्याधर पाटील तसेच कामगार प्रतिनिधी जयराम काठे, भीम शिलकर, उत्तम म्हात्रे आणि अविनाश गायकर उपस्थित होते.
कामगारांच्या वेतनवाढीसह आरोग्य आणि आर्थिक सुरक्षिततेच्या दृष्टीने विविध सुविधा मिळवून देण्यासाठी संघटनेने केलेल्या प्रयत्नांना या करारामुळे यश आले आहे.
