4kNews कामोठे दि. 31
पनवेल : नवी मुंबई पोलीस आयुक्तालयाच्या परिमंडळ-३, पनवेल यांच्या वतीने ‘उडान… नवी आशा–नवी दिशा’ हा जनजागृतीपर कार्यक्रम २८ ऑक्टोबर रोजी पनवेल येथील अण्णासाहेब वर्तक सभागृहात आयोजित करण्यात आला. किशोरवयीन मुलींना सोशल मीडिया, ऑनलाइन चॅटिंग, वैयक्तिक माहिती व छायाचित्रे शेअर करणे तसेच ऑनलाइन ब्लॅकमेलिंग यांपासून सुरक्षित राहण्याबाबत मार्गदर्शन करण्यात आले.
चैत्र फाउंडेशन, पुणे यांच्या सहकार्याने आयोजित या कार्यक्रमात विविध शाळा व कनिष्ठ महाविद्यालयांतील सुमारे ४५० विद्यार्थिनी आणि शिक्षक सहभागी झाले. राज्यमंत्री मेघना साकोरे-बोर्डीकर यांची प्रमुख उपस्थिती होती. चैत्र फाउंडेशनच्या संचालिका चित्रा मेटे यांनी चित्रफितींच्या माध्यमातून विद्यार्थिनींना मार्गदर्शन केले. तसेच सायबर सुरक्षेबाबत पोलिसांनी माहिती दिली, तर कराटे प्रशिक्षक दादा माने यांनी स्वसंरक्षणाची प्रात्यक्षिके सादर केली.
पोलीस आयुक्त मिलिंद भारंबे, पोलीस सहआयुक्त दीपक साकोरे, अपर पोलीस आयुक्त डॉ. प्रमोद शेवाळे, मोहिनीताई विक्रांत पाटील आणि डॉ. प्रीती पांडे यांच्या मार्गदर्शनाखाली हा उपक्रम पार पडला. किशोरवयीन मुलींमध्ये जागरूकता निर्माण करून त्यांना संभाव्य धोक्यांपासून स्वतःचे संरक्षण करता यावे, हा या कार्यक्रमाचा मुख्य उद्देश होता.
