4k समाचर दि. 2
गुळसुंदे : श्रद्धा, सौंदर्य आणि परंपरेचा अनोखा संगम मानला जाणारा गौराई पूजनाचा सोहळा सोमवारी गुळसुंदे गावात मोठ्या भक्तिभावात साजरा करण्यात आला. चिंतामण कडवे यांच्या निवासस्थानी गेल्या ७० वर्षांपासून अखंड परंपरेने गौरी-गणपतीचे आगमन होत असून, यावर्षीही या परंपरेला उजाळा मिळाला.
गौराई पूजन हा केवळ धार्मिक विधी नसून स्त्रियांच्या एकत्र येण्याचा, पारंपरिक संस्कृती जपण्याचा आणि सामूहिक ऐक्य व्यक्त करण्याचा उत्सव मानला जातो. महिलांनी या दिवशी सकाळपासून घरची सजावट, पूजा साहित्याची तयारी यामध्ये मोठ्या उत्साहाने सहभाग घेतला. घरात फुलांनी व पारंपरिक अलंकारांनी गौराईचे स्वागत करण्यात आले. विविध प्रकारचे नैवेद्य, लाडू, पुरणपोळी, मोदक, खोबरं-पातोळे अशा पदार्थांनी गौराईचा नैवेद्य सजवण्यात आला.
पूजेनंतर गावातील महिलांनी मंगलाष्टकं, ओव्या व पारंपरिक गाणी गाऊन वातावरण भारावून टाकले. महिलांचे पारंपरिक पेहराव, शृंगार आणि घराघरातली भक्तिभावाची रंगत गावकऱ्यांच्या दृष्टीसही आनंददायी ठरली. या उत्सवात लहान मुलांपासून वृद्धांपर्यंत सर्वच वयोगटातील महिला सहभागी झाल्या होत्या.
गेल्या सात दशकांपासून कडवे कुटुंबियांच्या माध्यमातून ही परंपरा अखंड सुरू असून, गुळसुंदे गावातील प्रत्येक घराला तिचे वेगळे आकर्षण आहे. स्थानिक ग्रामस्थांनीही या पूजन सोहळ्यात सहभागी होत श्रद्धेने गौराईचे दर्शन घेतले.
गौराई पूजनाच्या या पारंपरिक सोहळ्यामुळे गुळसुंदे गावात भक्ती, उत्साह आणि स्त्रीशक्तीच्या ऐक्याचे दर्शन घडले.
