4k समाचार
पनवेल दि. ०६ ( वार्ताहर ) : सणांचा राजा असलेल्या दिवाळीच्या तयारीसाठी साऱ्यांची लगबग सुरू झाली असून विविध वस्तू खरेदीसाठी बाजारात ग्राहकांची मोठी गर्दी होऊ लागली आहे. यानिमित्ताने बाजारात चैतन्य निर्माण झाले आहे. प्रकाशाचा उत्सव असलेल्या या सणानिमित्त आकाश कंदील, पणत्यांची दुकाने जागोजागी थाटली आहे. हे आकर्षक आकाशकंदील लक्ष वेधून घेत असून यावर्षी आकाश कंदीलांचे पारंपारिक आणि काही नवे प्रकारही बाजारात दाखल झाले आहेत.
दिवाळीला अवघे काही दिवस शिल्लक राहिले असून पनवेल परिसरातील अनेक कुटुंबीय दिवसरात्र जागरण करीत इको फ्रेंडली आकाश कंदील तयार करण्याचे काम करीत आहेत . सुमारे दशकभरापासून अनेक कुटुंबीय तयार करीत असलेल्या आकाशकंदिलांना पनवेलसह परिसरातील पर्यावरणपूरक दिवाळी साजरी करणाऱ्यांकडून मोठी मागणी आहे. सध्या मिनी आकाशकंदील २० रुपयांपासून महा आकाश कंदील जवळपास १००० रुपयांपर्यंत येथे मिळत असतो. हल्ली इको फ्रेंडली वस्तूंची मागणी मोठ्या प्रमाणात वाढू लागली आहे. रंगीबेरंगी कापडी, हॉलोग्राफी, मार्बल पेपर यासह फोल्डिंगचे असंख्य प्रकारचे आकर्षक आकाश कंदील विक्रीसाठी बाजारात दाखल झाले आहे. त्यात पैराशूट कंदील, आकाशदीप, फायर बॉल, कलश, टोमॅटो बॉल, हॅण्डमेड कापडी तसेच लहान आकाराचे अशा आकाश कंदिलांना चांगली मागणी असून ५० ते ५०० रुपयांपर्यंत भाव आहे. शहरातील अन्य बाजारपेठेतील दुकाने आकाशदिव्यांनी सजली आहेत.
यंदाच्या वर्षी किंमतीत आठ ते दहा टक्क्यांनी वाढगत वर्षीपेक्षा यंदा आकाशदिव्याच्या किंमती ८ ते १० टक्क्यांनी वाढल्याचे व्यापाऱ्यांनी सांगितले, ग्राहकांनी मेड इन चायना आणि प्लास्टिकच्या आकाशकंदिलांकडे पाठ फिरवली आहे. त्यामुळे इको फ्रेंडली आकाश कंदील तयार करणाऱ्या विक्रेत्यांकडे दरवर्षी मागणी सातत्याने वाढत आहे. पूर्वीचे कामट्यापासून तयार करण्यात येत असलेले आकाश कंदील आता दिसेनासे झाले आहेत . देशी बनावटीच्या आकाश दिव्याना जास्त पसंती मिळत नसल्याचे विक्रेत्यांनी सांगितले.त्यामुळे बाजारपेठा रंगीबेरंगी कंदिलांनी चांगल्याच सजल्या आहेत .
