4kNews कामोठे दि. 6
पनवेल (प्रतिनिधी) पनवेलचे संवेदनशील आमदार प्रशांत ठाकूर यांच्या वाढदिवसानिमित्त अनावश्यक खर्च टाळून सामाजिक बांधिलकी जपण्याच्या उपक्रमांना प्राधान्य देण्यात येत आहे. याच भावनेतून महिला मोर्चाच्या पनवेल शहर मंडल अध्यक्षा तथा पनवेल महापालिकेच्या नगरसेविका रुचिता लोंढे-समेळ यांनी बालग्राम, पनवेल येथील अनाथाश्रमाला जीवनोपयोगी वस्तूंची मदत देत सामाजिक बांधिलकी जपली.
“वाढदिवसानिमित्त फुलं, हार, तुरे आणि बॅनरवर अनावश्यक खर्च न करता लोकोपयोगी कामात सहभागी व्हा,” असे आवाहन आमदार प्रशांत ठाकूर यांनी केले होते. त्यांच्या या आवाहनाला प्रतिसाद देत रुचिता लोंढे-समेळ, चिन्मय समेळ, प्राजक्ता पाटील यांनी बालग्रामला भेट देऊन तेथील ४० अनाथ मुलांच्या दैनंदिन गरजा लक्षात घेऊन जीवनोपयोगी वस्तूंची मदत केली. यावेळी बालग्रामचे विनायक पाटील हे सुद्धा उपस्थित होते.
वाढदिवसाचा आनंद केवळ शुभेच्छा आणि सत्कारापुरता मर्यादित न ठेवता गरजूंच्या चेहऱ्यावर आनंद फुलविण्याचा हा उपक्रम सामाजिक बांधिलकीचा आदर्श ठरला. आमदार प्रशांत ठाकूर यांच्या आवाहनाला प्रतिसाद देत विविध सामाजिक उपक्रम राबविण्यात येत असून, त्यातून वाढदिवसाच्या निमित्ताने समाजोपयोगी कार्याला नवी दिशा मिळत आहे.
