4kNews कामोठे दि. 6
पनवेल (प्रतिनिधी) : येथून प्रकाशित होणाऱ्या ‘माझं पनवेल’ वृत्तपत्राच्या १३व्या दिवाळी विशेषांकाचा प्रकाशन सोहळा उत्साहात पार पडला. माजी खासदार लोकनेते रामशेठ ठाकूर यांच्या हस्ते या विशेषांकाचे प्रकाशन करण्यात आले.
या वेळी लोकनेते दि. बा. पाटील यांचे पुत्र अतुल पाटील, ‘माझं पनवेल’चे संपादक विशाल मनोहर सावंत, ज्येष्ठ पत्रकार संजय कदम, दीपक घोसाळकर, भाजपचे शहर उपाध्यक्ष केदार भगत यांच्यासह संतोष सुतार, मयूर तांबडे, संतोष भगत, अनिल कुरघोडे, सुनील पाटील, साबीर शेख, तुकाराम आवळे, रवींद्र गायकवाड, आशिष साबळे आदी मान्यवर उपस्थित होते.
मनोगत व्यक्त करताना रामशेठ ठाकूर म्हणाले की, ‘माझं पनवेल’ हे नाव वाचताच प्रत्येकाला आपल्या पनवेलचा अभिमान वाटतो. या नावातून आपल्या शहरासाठी काहीतरी करण्याची प्रेरणा मिळते. दिवाळी विशेषांकात दर्जेदार लेख, कथा आणि विचारांना स्थान देण्यात आले आहे. त्यांनी संपादक विशाल सावंत आणि त्यांच्या संपूर्ण टीमचे अभिनंदन करून पुढील वाटचालीस शुभेच्छा दिल्या.
या विशेषांकाच्या प्रकाशनानिमित्त पनवेलमधील साहित्यिक, पत्रकार आणि सामाजिक क्षेत्रातून संपादक विशाल सावंत व त्यांच्या सहकाऱ्यांचे अभिनंदन होत आहे.
