4kNews कामोठे
मुंबई, दि. 9 (अजित मोहिते) : सरकारी व अनुदानित शाळा-महाविद्यालये बंद करण्याचे निर्णय मागे घ्यावेत आणि सर्वांना समान व गुणवत्तापूर्ण शिक्षण मिळावे, या मागण्यांसाठी ‘शाळा वाचवा–शिक्षण वाचवा मंच महाराष्ट्र’च्या वतीने ५ ऑक्टोबरपासून मुंबईतील आझाद मैदानात बेमुदत धरणे आंदोलन सुरू करण्यात आले आहे. सार्वजनिक शिक्षण व्यवस्था मजबूत करावी आणि शिक्षकांची रिक्त पदे तातडीने भरावीत, अशी मागणी आंदोलनकर्त्यांनी केली आहे.
कोणतीही शाळा, तुकडी, माध्यमिक शाखा किंवा महाविद्यालय बंद करू नये, प्रत्येक वर्गासाठी व विषयासाठी स्वतंत्र शिक्षक नेमावेत आणि गुणवत्तापूर्ण शिक्षणावर परिणाम करणारा १५ मार्च २०२४ चा शासन निर्णय मागे घ्यावा, अशी मागणी मंचाने केली आहे. तसेच, केजी ते पीजीपर्यंत सर्वांना मोफत व समान शिक्षण द्यावे आणि शिक्षणावरील सरकारी खर्च राष्ट्रीय उत्पन्नाच्या १० टक्क्यांपर्यंत वाढवावा, अशी भूमिका मांडण्यात आली.
राज्यातील अनेक सरकारी शाळांमध्ये पिण्याचे पाणी, स्वच्छतागृहे आणि इतर मूलभूत सुविधांचा अभाव असल्याचा आरोप आंदोलकांनी केला. महानगरपालिका, नगरपालिका, जिल्हा परिषद आणि अनुदानित शाळांमधील शिक्षकांची रिक्त पदे भरावीत तसेच शिक्षकांना अशैक्षणिक कामांतून मुक्त करावे, अशी मागणीही करण्यात आली.
नवीन राष्ट्रीय शैक्षणिक धोरणामुळे सरकारी व अनुदानित शाळा-महाविद्यालयांवर परिणाम होऊन शिक्षणाचे खासगीकरण आणि बाजारीकरण वाढण्याची भीती मंचाने व्यक्त केली. महाराष्ट्राच्या गरजांनुसार स्वतंत्र विद्यार्थी व ज्ञानकेंद्रित शिक्षण धोरण तयार करावे, अशी मागणीही करण्यात आली. शाळा बंद करण्याऐवजी सार्वजनिक शिक्षण व्यवस्थेत गुंतवणूक वाढवून ती सक्षम करावी, असे आवाहन आंदोलकांनी केले.
या आंदोलनात प्रयास एक कोशिश, छात्रभारती, सत्यशोधक विद्यार्थी, एसएफआय महाराष्ट्र, एआयएसएफ महाराष्ट्र, सम्यक विद्यार्थी, आयसा महाराष्ट्र, एनएसयूआय महाराष्ट्र यांसह विविध विद्यार्थी व सामाजिक संघटनांचे प्रतिनिधी सहभागी झाले आहेत. कॉ. संपत देसाई, संजय वेतुरेकर, सिद्धार्थ जगदेव, डायना महाकाल, दीप्ती शेलार, तुषार सूर्यवंशी आणि अन्य कार्यकर्त्यांनी आंदोलनात सहभाग घेतला. सरकारकडून सकारात्मक प्रतिसाद मिळेपर्यंत आंदोलन सुरू ठेवण्याचा इशारा मंचाने दिला आहे.
