4kNews कामोठे
पनवेल, दि.31 (वार्ताहर) : नवीन पनवेलमधील प्रभाग क्रमांक १७ अंतर्गत येणाऱ्या उद्याने आणि ग्रीन बेल्ट परिसरांची दुरवस्था झाली आहे. उद्यानांमध्ये कचरा, प्लास्टिक पिशव्या, दारूच्या व पाण्याच्या बाटल्या साचल्या असून, नियमित स्वच्छता आणि देखभालीअभावी नागरिकांना त्रास सहन करावा लागत आहे. तसेच पाणी न मिळाल्याने शोभेची झाडे सुकू लागली आहेत. या समस्येकडे लक्ष वेधत नगरसेवक अॅड. मनोज सिंधू कृष्णाजी भुजबळ यांनी महापौरांना निवेदन देऊन तातडीने उपाययोजना करण्याची मागणी केली आहे.
उद्यानांमध्ये झाडेझुडपे आणि गवत वाढल्याने अस्वच्छता निर्माण झाली असून, साप व विंचू लपून बसण्याची शक्यता आहे. येथे ज्येष्ठ नागरिक, महिला आणि लहान मुले नियमित येत असल्याने त्यांच्या सुरक्षिततेचा प्रश्न निर्माण झाला आहे. तसेच उद्यानांच्या देखभालीसाठी नियुक्त कामगार अन्य कामांसाठी वळविण्यात आल्याची माहितीही निवेदनात देण्यात आली आहे.
प्रभागातील सर्व उद्यानांची नियमित स्वच्छता करावी, वाढलेली झुडपे हटवावीत, कचऱ्याची विल्हेवाट लावावी आणि झाडांना नियमित पाणी देण्याचे आदेश संबंधित विभागाला द्यावेत, अशी मागणी अॅड. भुजबळ यांनी केली आहे.
