4kNews कामोठे
पनवेल, दि. 31 (वार्ताहर) : पनवेल शहर पोलीस ठाण्याच्या हद्दीतून सुमारे चार लाख रुपये किमतीची बीएमडब्ल्यू मोटारसायकल चोरी केल्याप्रकरणी पोलिसांनी नाशिक येथील अमोल शिरसाठ याला अटक केली आहे. त्याच्याकडून चोरीची बीएमडब्ल्यू मोटारसायकल जप्त करण्यात आली असून, तपासात कळंबोली परिसरातील आणखी एका मोटारसायकल चोरीच्या गुन्ह्याचाही उलगडा झाला आहे.
२२ ऑक्टोबर रोजी सायंकाळी ५.४५ वाजण्याच्या सुमारास करंजाडे येथील आर-०४ परिसरातील प्लॉट क्रमांक २०८ येथे पार्क केलेली बीएमडब्ल्यू जी ३१० आरआर स्पोर्ट्स मोटारसायकल चोरीला गेली होती. याप्रकरणी पनवेल शहर पोलीस ठाण्यात गुन्हा दाखल करण्यात आला होता.
वरिष्ठ पोलीस निरीक्षक बाळा कुंभार यांच्या मार्गदर्शनाखाली पोलीस उपनिरीक्षक किरण राऊत व पथक आरोपीचा शोध घेत होते. दरम्यान, पळस्पे महामार्ग वाहतूक पोलीस केंद्रातील पोलीस हवालदार सचिन हांडे यांनी संशयावरून दुचाकीवरील दोघांना थांबविण्याचा प्रयत्न केला. यावेळी एक जण पळून गेला, तर अमोल शिरसाठ याला ताब्यात घेण्यात आले. त्याच्याकडील बीएमडब्ल्यू मोटारसायकल चोरीची असल्याचे निष्पन्न झाल्यानंतर ती जप्त करण्यात आली.
पुढील तपासात कळंबोली पोलीस ठाण्यातील चोरीच्या गुन्ह्यातील ९० हजार रुपये किमतीची यामाहा एफझेडएस मोटारसायकलही हस्तगत करण्यात आली. तसेच, अमोल शिरसाठ हा नाशिक रोड पोलीस ठाण्यातील अन्य एका गंभीर गुन्ह्यातही पाहिजे आरोपी असल्याचे समोर आले आहे. या प्रकरणातील दुसरा संशयित राकेश गोकुळ राठोड (वय २४, रा. पंचवटी, नाशिक) हा फरार असून, पोलीस त्याचा शोध घेत आहेत. पुढील तपास पोलीस उपनिरीक्षक किरण राऊत करीत आहेत.
