4kNews कामोठे
विकतच्या बाटल्यांवर तहान भागवण्याची वेळ; मूलभूत सुविधेकडे एसटी प्रशासनाचे दुर्लक्ष
पनवेल, दि. 31 (वार्ताहर) : राज्यातील विविध भागांतून ये-जा करणाऱ्या हजारो प्रवाशांची वर्दळ असलेल्या पनवेल एसटी बसस्थानकात पिण्याच्या पाण्याची पुरेशी व्यवस्था नसल्याची तक्रार प्रवाशांकडून होत आहे. बसची प्रतीक्षा करताना पाणी उपलब्ध होत नसल्याने प्रवाशांना विकतच्या बाटल्या घेऊन तहान भागवावी लागत आहे.
या गैरसोयीचा सर्वाधिक त्रास महिला, ज्येष्ठ नागरिक आणि लहान मुलांना सहन करावा लागत आहे. प्रवाशांकडून तिकिटाचे पैसे घेणाऱ्या एसटी प्रशासनाला बसस्थानकात स्वच्छ पिण्याचे पाणी उपलब्ध करून देता येत नाही का, असा सवाल प्रवाशांकडून उपस्थित केला जात आहे. प्रवाशांची ही गैरसोय दूर करण्यासाठी एसटीच्या वरिष्ठ अधिकाऱ्यांनी तातडीने पाहणी करून बसस्थानकात स्वच्छ पिण्याच्या पाण्याची कायमस्वरूपी व्यवस्था करावी, अशी मागणी होत आहे.
