4kNews कामोठे दि. 31
पनवेल (प्रतिनिधी) : पनवेल महानगरपालिकेच्या प्रभाग क्रमांक १७ मधील ए-टाईप परिसरात नागरिकांना दूषित व कडवट पाण्याचा पुरवठा होत असल्याच्या तक्रारी समोर आल्या आहेत. यामुळे नागरिकांच्या आरोग्याचा प्रश्न निर्माण झाला असून, कावीळसदृश आजारांची प्रकरणेही समोर येत असल्याने चिंता व्यक्त केली जात आहे.
या समस्येची दखल घेत नगरसेविका अस्मिता घरत यांनी माजी नगरसेविका वर्षा नाईक व स्थानिक नागरिकांसह सिडकोच्या पाणीपुरवठा विभागाचे अधिकारी सिद्धांत सोनवणे यांची भेट घेतली. यावेळी परिसरातील मुख्य जलवाहिनीचे सर्वेक्षण करून अहवाल सादर करावा, तसेच पुरवठा होणाऱ्या पाण्याचे प्रयोगशाळेत परीक्षण करून अहवाल उपलब्ध करून द्यावा, अशी मागणी करण्यात आली.
यावर प्रथम जलवाहिनीचे सर्वेक्षण व पाण्याची तपासणी करण्यात येईल. त्यानंतर आवश्यकतेनुसार जुनी पाइपलाइन बदलून नवीन जलवाहिनी टाकण्याबाबत कार्यवाही केली जाईल, असे आश्वासन अधिकारी सिद्धांत सोनवणे यांनी दिले. नागरिकांना स्वच्छ व सुरक्षित पाणी मिळण्यासाठी या समस्येचा कायमस्वरूपी पाठपुरावा करणार असल्याचे नगरसेविका अस्मिता घरत यांनी सांगितले.
