4kNews कामोठे दि. 8
पनवेल दि.०६ रोजी (वार्ताहर): पनवेल येथील ओरायन मॉलच्या यशस्वी १० वर्षांच्या प्रवासानिमित्त आनंद सोहळा आद्य क्रांतिवीर वासुदेव बळवंत फडके नाट्यगृहात आयोजित करण्यात आला होता. गेल्या दशकभराचा हा प्रवास आव्हानात्मक आणि बरेच काही शिकवणारा ठरला असला, तरी ग्राहकांच्या, नागरिकांच्या आणि सुहृदांच्या खंबीर पाठिंब्यामुळेच मॉलने ही यशस्वी वाटचाल पूर्ण केल्याची भावना व्यवस्थापनाकडून व्यक्त करण्यात आली.
या वर्धापनदिनाचे औचित्य साधून आयोजित करण्यात आलेल्या या दिमाखदार सोहळ्याला भाजपचे प्रदेश सचिव आमदार प्रशांत ठाकूर, आमदार विक्रांत पाटील, कोकण म्हाडाचे माजी अध्यक्ष बाबाळासाहेब पाटील, सिडकोचे सह व्यवस्थापकीय संचालक गणेश देशमुख, यांच्यासह अनेक मान्यवरांनी उपस्थित राहून ओरायन मॉल परिवाराला पुढील वाटचालीसाठी मनःपूर्वक शुभेच्छा दिल्या. कार्यक्रमाचे मुख्य आकर्षण ठरलेल्या बरवा मनोरंजन मंडळी प्रस्तुत “लाभले आम्हास भाग्य” या विशेष सांस्कृतिक कार्यक्रमाने उपस्थितांची मने जिंकली.
या सादरीकरणात सुनील बर्वे, पुष्कर श्रोत्री, आनंद इंगळे, मृण्मयी देशपांडे, गौतमी देशपांडे आणि संगीतकार अजित परब या महाराष्ट्राच्या लाडक्या कलाकारांनी आपल्या बहारदार सादरीकरणाने रंगत आणली. या कार्यक्रमावेळी भाजपचे जिल्हा अध्यक्ष अविनाश कोळी, माजी सभागृहनेते तथा नगरसेवक परेश ठाकूर, माजी विरोधीपक्ष नेते प्रीतम म्हात्रे, पनवेल शहर अध्यक्ष नगरसेवक सुमित झुंझारराव, सिडकोचे सह व्यवस्थापकीय संचालक गणेश देशमुख, ओरायन मॉलचे मालक मंगेश परुळेकर, दिलीप करेलिया, मनन परुळेकर यांच्यासह पनवेलकर मोठ्या संख्येने उपस्थित होते.
