4kNews कामोठे दि. 12
*सरपंच सुभाषशेठ भोपी यांच्या मार्गदर्शनाखाली शेकापचा झेंडा कायम, गावात जल्लोष*
*पनवेल/प्रतिनिधी:* दुंदरे ग्रुप ग्रामपंचायतीच्या उपसरपंचपदाची निवडणूक अत्यंत उत्साहात आणि खेळीमेळीच्या वातावरणात पार पडली. आधीचे उपसरपंच महेश पाटील यांनी आपल्या पदाचा राजीनामा दिल्यामुळे रिक्त झालेल्या या जागेसाठी आज विशेष निवडणूक घेण्यात आली होती. दुंदरे ग्रामपंचायतीचे लोकप्रिय सरपंच सुभाषशेठ भोपी यांच्या खंबीर नेतृत्वाखाली आणि मार्गदर्शनाखाली ही निवडणूक प्रक्रिया पार पडली असून, यात शेतकरी कामगार पक्षाच्या (शेकाप) कार्यकर्त्या सुप्रिया हनुमान करमेलकर यांची उपसरपंचपदी बिनविरोध निवड झाली आहे.
सरपंच सुभाषशेठ भोपी यांच्या अचूक नियोजनामुळे आणि मार्गदर्शनामुळे ही निवड बिनविरोध झाली असून, दुंदरे गावावर शेकापचाच लाल झेंडा अद्यापही भक्कमपणे फडकत असल्याचे यामुळे पुन्हा एकदा अधोरेखित झाले आहे. ग्रामपंचायत अधिकाऱ्यांच्या देखरेखीखाली या निवडीची अधिकृत घोषणा करण्यात आली. याप्रसंगी शेकाप पनवेल विधानसभा मतदारसंघ अध्यक्ष काशिनाथ पाटील, तालुका चिटणीस राजेश केणी, माजी सरपंच भारतशेठ भोपी, माजी उपसरपंच जयदास चौधरी, माजी उपसरपंच महेश पाटील, माजी ग्रामपंचायत सदस्य विष्णू शेळके, सदस्य विश्वास पाटील, माजी कृषी उत्पन्न बाजार समिती सदस्य महादेव गायकर, माजी सदस्य बाळाराम गवळी, माजी सदस्य अशोक पाटील तसेच माजी सदस्य आणि दुंदरे विभागातील शेकापचे निष्ठावान कार्यकर्ते दिलीप उलवेकर यांच्यासह ग्रामस्थ व पक्षाचे कार्यकर्ते मोठ्या संख्येने उपस्थित होते.
निवडणूक प्रक्रिया पूर्ण झाल्यानंतर नवनिर्वाचित उपसरपंच सुप्रिया हनुमान करमेलकर यांनी सरपंच सुभाषशेठ भोपी आणि पक्षाचे आभार मानत आपले मनोगत व्यक्त केले. त्या म्हणाल्या की, सरपंच महोदय, पक्षाचे ज्येष्ठ नेते आणि सर्व सहकाऱ्यांनी माझ्यावर जो विश्वास दाखवला आहे, त्याबद्दल मी सर्वांची ऋणी आहे. ही निवडणूक बिनविरोध करून गावाने जी एकी दाखवली आहे, ती खरोखरच कौतुकास्पद आहे. माजी उपसरपंच महेश पाटील यांनी सुरू ठेवलेली विकासाची मालिका पुढे नेणे ही माझी मुख्य जबाबदारी असेल. सरपंच सुभाषशेठ भोपी यांच्या मार्गदर्शनाखाली दुंदरे गावातील रस्ते, पाणी, आणि वीज यांसारख्या मूलभूत सुविधा अधिक सक्षम करण्यासाठी मी कटिबद्ध राहीन. पक्षाचा आदेश आणि जनतेची सेवा हेच माझे ध्येय असेल आणि आपण सर्वांनी मिळून गावाचा कायापालट करूया, अशी ग्वाही त्यांनी याप्रसंगी दिली.
यानंतर उपस्थितांना संबोधित करताना सरपंच सुभाषशेठ भोपी यांनी आपल्या नेतृत्वाची चुणूक दाखवत सर्वांचे आभार मानले. सरपंच सुभाषशेठ भोपी म्हणाले की, दुंदरे ग्रामपंचायतीवर शेकापचे निर्विवाद वर्चस्व आहे आणि आज सुप्रिया करमेलकर यांच्या बिनविरोध निवडीने त्यावर पुन्हा एकदा शिक्कामोर्तब केले आहे. मी आमच्या नवनिर्वाचित उपसरपंचांचे मनापासून स्वागत करतो आणि त्यांना भावी वाटचालीस शुभेच्छा देतो. आपल्या गावाचा विकास हा कोणत्याही एका व्यक्तीचा नसून संपूर्ण टीमचा प्रयत्न असतो. आज काशिनाथ पाटील, राजेश केणी,माजी जिल्हा परिषद सदस्य विलास फडके,भारतशेठ भोपी आणि दिलीप उलवेकर यांच्यासारख्या ज्येष्ठ नेत्यांच्या मार्गदर्शनाखाली आमची टीम भक्कमपणे काम करत आहे. नवनिर्वाचित उपसरपंचांच्या ऊर्जेचा फायदा गावातील प्रलंबित कामे जलद गतीने पूर्ण करण्यासाठी नक्कीच होईल. आम्ही दोघे आणि सर्व सदस्य मिळून दुंदरे गावाला तालुक्यात एक आदर्श ग्रामपंचायत बनवण्यासाठी अहोरात्र कष्ट करू, असा विश्वास सरपंच सुभाषशेठ भोपी यांनी व्यक्त केला. उपसरपंचपदी सुप्रिया करमेलकर यांच्या निवडीची घोषणा होताच कार्यकर्त्यांनी गुलालाची उधळण करत आणि शेकापच्या घोषणा देत एकच जल्लोष केला. नवनियुक्त उपसरपंचांसह सरपंच सुभाषशेठ भोपी यांच्या नेतृत्वावर सर्व स्तरातून अभिनंदनाचा वर्षाव होत आहे.
