4kNews कामोठे
उरण दि. 18 (विठ्ठल ममताबादे) : नागपंचमीनिमित्त सर्पांविषयीचे समज-गैरसमज दूर करून वैज्ञानिक दृष्टिकोनातून जनजागृती करण्यासाठी फ्रेंड्स ऑफ नेचर (FON) सर्पमित्र निसर्ग संवर्धन संस्था, चिरनेर-उरण यांच्या वतीने ‘सर्प – समज, गैरसमज आणि विज्ञान’ या विषयावर तीन ठिकाणी जनजागृती कार्यक्रम घेण्यात आले.
रयत शिक्षण संस्थेच्या मॉडर्न स्कूल, वाशी येथे तुषार म्हात्रे, कर्मवीर भाऊराव पाटील माध्यमिक व उच्च माध्यमिक विद्यालय, पिरकोन येथे जयवंत रामदास ठाकूर, तर पंचरत्न इंग्लिश मीडियम स्कूल, पिरकोन येथे निकेतन रमेश ठाकूर यांनी विद्यार्थ्यांना मार्गदर्शन केले.
यावेळी सर्पांचे पर्यावरणातील महत्त्व, सर्पांविषयीचे गैरसमज व अंधश्रद्धा, सर्पदंशापासून बचाव, प्रथमोपचार आणि सर्प-मानव सहजीवन याबाबत वैज्ञानिक माहिती देण्यात आली. सर्पांविषयीची भीती दूर करून त्यांचे संवर्धन व मानवी सुरक्षितता यांचा समतोल साधण्याचे आवाहन करण्यात आले.
हा उपक्रम संस्थेच्या ‘शून्य सर्पदंश मृत्यू अभियान’चा भाग असून, Snakebite Action Team (S.A.T.)च्या माध्यमातून सर्पदंशाच्या घटना व मृत्यू रोखण्यासाठी जनजागृती केली जात आहे. कार्यक्रमास शाळांचे मुख्याध्यापक, शिक्षक, शिक्षकेतर कर्मचारी, स्कूल समिती सदस्य तसेच FONचे स्वयंसेवक हृषिकेश म्हात्रे व जय गायकवाड उपस्थित होते.
