4kNews कामोठे
पनवेल, दि. 6सप्टेंबर : पनवेल शहरात वाहतुकीचे नियम मोडणाऱ्या रिक्षाचालकांविरोधात पनवेल शहर वाहतूक शाखा आणि प्रादेशिक परिवहन विभागाच्या वतीने संयुक्त विशेष मोहीम राबविण्यात आली.
शनिवारी सकाळी ९.३० ते ११.३० या वेळेत पोलीस निरीक्षक सुभाष पुजारी व सहाय्यक मोटार वाहन निरीक्षक अनिल गेळे यांच्या मार्गदर्शनाखाली ही कारवाई करण्यात आली. यावेळी फ्रंट सीट बसविणे, गणवेश न घालणे, मीटरप्रमाणे रिक्षा न चालविणे तसेच अन्य वाहतूक नियमांचे उल्लंघन करणाऱ्या रिक्षाचालकांवर कारवाई करण्यात आली.
या मोहिमेत एकूण १६६ रिक्षांवर कारवाई करून २ लाख ७७ हजार ६५० रुपयांचा दंड आकारण्यात आला. शहरातील वाहतूक व्यवस्था सुरळीत ठेवण्यासाठी अशा विशेष तपासणी मोहिमा यापुढेही सुरू राहणार असल्याचे वाहतूक शाखेकडून सांगण्यात आले.
