4kNews कामोठे
पनवेल, दि. 6 (वार्ताहर) : गणेशोत्सव शांततेत, सुरक्षित आणि शिस्तबद्ध वातावरणात पार पडावा, यासाठी खांदेश्वर पोलिसांनी सार्वजनिक गणेशोत्सव मंडळांच्या पदाधिकाऱ्यांची बैठक घेत विविध सूचना केल्या. खांदा कॉलनीतील खान्देश हॉल येथे झालेल्या बैठकीला सुमारे ५० ते ६० मंडळांचे पदाधिकारी उपस्थित होते.
मंडप उभारताना जागामालक तसेच संबंधित विभागांच्या आवश्यक परवानग्या घेणे आणि शासनाच्या नियमांचे पालन करणे बंधनकारक असल्याचे पोलिसांनी स्पष्ट केले. गणेशमूर्तीच्या सुरक्षेसाठी मंडपात दिवसरात्र स्वयंसेवक तैनात ठेवण्यासोबतच सीसीटीव्ही बसविण्याच्या सूचना देण्यात आल्या.
ध्वनिक्षेपकासाठी न्यायालयाच्या नियमांचे पालन करावे. तसेच डीजे, डॉल्बी सिस्टीम आणि लेझर लाईटचा वापर टाळावा, असे स्पष्ट करण्यात आले. देखावे व फलकांवर आक्षेपार्ह मजकूर नसावा, दर्शनासाठी महिला-पुरुषांच्या स्वतंत्र रांगा ठेवाव्यात आणि मिरवणुका शक्यतो रस्त्याच्या एका बाजूने काढाव्यात, अशा सूचनाही देण्यात आल्या.
विसर्जनासाठी वापरण्यात येणाऱ्या वाहनांची आरटीओकडून तपासणी करून घेणे व चालकाचा परवाना तपासणे आवश्यक असल्याचे पोलिसांनी सांगितले. दरम्यान, २३ गणेशोत्सव मंडळांच्या पदाधिकाऱ्यांना बीएनएसएस कलम १६८ अंतर्गत नोटीस बजावण्यात आली असून, उर्वरित मंडळांनाही नोटिसा देण्यात येणार आहेत.
बैठकीस वरिष्ठ पोलीस निरीक्षक स्मिता ढाकणे यांच्यासह खांदेश्वर पोलीस ठाण्याचे अधिकारी व कर्मचारी उपस्थित होते.
