4kNews कामोठे
पनवेल, दि. 8 (वार्ताहर) : अमेरिका-जपान कराटे असोसिएशन इंटरनॅशनलशी संलग्न न्यू बॉम्बे कराटे क्लबच्या खेळाडूंनी आशिया चषक २०२६ तसेच अखिल भारतीय खुल्या कराटे अजिंक्यपद स्पर्धेत उल्लेखनीय कामगिरी करत विविध पदकांची कमाई केली.
देशभरातील नामांकित खेळाडूंच्या सहभागात झालेल्या या स्पर्धांमध्ये क्लबच्या खेळाडूंनी कुमिते आणि काटा प्रकारांत उत्कृष्ट कौशल्याचे प्रदर्शन केले. सातत्यपूर्ण प्रशिक्षण, शिस्त, कठोर सराव आणि पालकांचे सहकार्य यामुळे ही कामगिरी साध्य झाल्याचे क्लबच्या वतीने सांगण्यात आले.
क्लबचे मुख्य प्रशिक्षक व अध्यक्ष रोहन यादव, अमेरिका-जपान कराटे असोसिएशन इंटरनॅशनल इंडियाचे राष्ट्रीय प्रतिनिधी योगेश कांबळी आणि संचालक बिपिन राय यांनी सर्व विजेत्या व सहभागी खेळाडूंचे अभिनंदन केले.
राष्ट्रीय व आंतरराष्ट्रीय स्तरावर खेळाडूंना घडविण्यासाठी सातत्याने प्रशिक्षण आणि तांत्रिक मार्गदर्शन दिले जात असून, आगामी स्पर्धांमध्ये आणखी चांगली कामगिरी करण्याचा निर्धार खेळाडूंनी व्यक्त केला.
