4kNews दि. 10
उरण तालुक्यात पुन्हा एकदा बिबट्याच्या हालचालींची चाहूल लागली आहे. पाणदिवे, कोप्रोली डोंगरातील निळी खान तसेच छोटे धरण परिसरात बिबट्याचे स्पष्ट पावलांचे ठसे आढळून आले असून, त्यामुळे ग्रामस्थांमध्ये भीतीचे वातावरण निर्माण झाले आहे.
उत्तम म्हात्रे यांच्या तीन बकऱ्यांना बिबट्याने ठार केल्याची घटना घडली असून, हा हल्ला रात्रीच्या सुमारास झाल्याचा अंदाज व्यक्त केला जात आहे. घटनेची माहिती मिळताच ग्रामस्थांनी परिसरात तपास केला असता पावलांचे ठसे मोठ्या प्रमाणात दिसून आले.
दरम्यान, या हालचालींना वनविभागाकडून अद्याप अधिकृत दुजोरा मिळालेला नसला तरी संबंधित विभागाने तपास सुरू केला आहे. खबरदारी म्हणून ग्रामस्थांना रात्री अनावश्यकपणे बाहेर न पडण्याचे, पाळीव जनावरांना सुरक्षित ठिकाणी ठेवण्याचे आणि संशयास्पद हालचाली दिसताच तात्काळ कळविण्याचे आवाहन करण्यात आले आहे.
बिबट्याची वाढती हालचाल पाहता ग्रामस्थांमध्ये चिंतेचे वातावरण असून, वनविभागाकडून त्वरित उपाययोजना करण्याची मागणी होत आहे.
