4kNews कामोठे
पनवेल, दि. २५ : पनवेल महानगरपालिकेच्या महिला व बालकल्याण विभागातर्फे शालेय विद्यार्थी व युवकांमध्ये जनजागृती करण्यासाठी ‘पथनाट्य जनजागृती अभियान’ सुरू करण्यात आले. महापौर नितीन पाटील यांच्या प्रमुख उपस्थितीत लोकनेते दि. बा. पाटील विद्यालय, शाळा क्र. १ येथे या अभियानाचा शुभारंभ झाला.
या अभियानातून अल्पवयीन मुलींचे शोषण रोखण्यासाठी ‘गुड टच-बॅड टच’, तसेच युवकांमधील मानसिक ताण व नैराश्याबाबत जनजागृती करण्यात येणार आहे. अडचणीच्या काळात पालक, शिक्षक किंवा विश्वासू व्यक्तींशी संवाद साधून योग्य वेळी मदत घेण्याचा संदेश पथनाट्याच्या माध्यमातून देण्यात आला.
महिला व बालकल्याण समितीच्या सभापती ममता प्रितम म्हात्रे यांच्या संकल्पनेतून सुरू झालेले हे अभियान महापालिकेच्या शाळांसह खासगी शाळा, मॉल, उद्याने, बाजारपेठा आणि नागरिकांची मोठी वर्दळ असलेल्या सार्वजनिक ठिकाणी टप्प्याटप्प्याने राबविण्यात येणार आहे.
यावेळी महिला व बालकल्याण समिती सभापती ममता प्रितम म्हात्रे, प्रभाग समिती सभापती अजय बहिरा, नगरसेविका दर्शना भोईर, प्रतिभा भोईर, प्रिती जॉर्ज, रुचिता लोंढे, डॉ. प्रियंका कांडपिळे, डॉ. अस्मिता घरत, योगिता फडके तसेच महापालिका अधिकारी, शिक्षक व विद्यार्थी उपस्थित होते.
“प्रत्येक मुलीला सुरक्षिततेची जाणीव आणि प्रत्येक युवकाला अडचणीच्या काळात योग्य आधार मिळणे आवश्यक आहे. मुलांनी व युवकांनी मनातील समस्या मोकळेपणाने व्यक्त करून योग्य वेळी मदत घ्यावी. सुरक्षित बालपण आणि सकारात्मक युवा पिढी घडविणे हाच अभियानाचा मुख्य उद्देश आहे.”
ममता प्रितम म्हात्रे, सभापती, महिला व बालकल्याण समिती, पनवेल महानगरपालिका
