4kNews कामोठे
पनवेल, दि. २३ (वार्ताहर) : ऑल जर्नालिस्ट अँड फ्रेंड्स सर्कल या राष्ट्रीय पत्रकार संघटनेतर्फे जाहीर करण्यात आलेल्या ‘पत्रकार प्रेरणा पुरस्कार २०२६’मध्ये पनवेलचे ज्येष्ठ पत्रकार संजय कदम यांना ‘जीवनगौरव पुरस्कार’ जाहीर झाला आहे. या सन्मानाबद्दल आमदार विक्रांत पाटील यांनी त्यांचा सत्कार करून अभिनंदन केले.
पत्रकारिता क्षेत्रातील प्रदीर्घ आणि उल्लेखनीय योगदानाची दखल घेत संजय कदम यांची पुरस्कारासाठी निवड करण्यात आली. मुंबई येथे झालेल्या राज्यस्तरीय पत्रकार प्रेरणा पुरस्कार सोहळ्यात त्यांना सन्मानित करण्यात आले.
यावेळी आमदार विक्रांत पाटील यांनी संजय कदम यांच्या पत्रकारितेतील कार्याचे कौतुक करून पुढील वाटचालीस शुभेच्छा दिल्या. जनसामान्यांच्या प्रश्नांना वाचा फोडण्याचे काम त्यांनी सातत्याने केले असल्याचे त्यांनी सांगितले.
याप्रसंगी माजी कोकण म्हाडा सभापती बाळासाहेब पाटील, नगरसेविका स्नेहल ढमाले-पाटील, मोहिनीताई विक्रांत पाटील, श्री. ढमाले तसेच ऑल जर्नालिस्ट अँड फ्रेंड्स सर्कलचे विश्वस्त गणेश कोळी व अॅड. मनोज म्हात्रे उपस्थित होते.
