4kNews कामोठे
वाकलेले होर्डिंग आणि उघड्या विद्युत तारांमुळे अपघाताचा धोका; नंदू वारुंगसे यांची तातडीच्या कारवाईची मागणी
पनवेल, दि. 23(वार्ताहर) : खारघरमधील रस्त्यालगत उभारलेल्या काही जाहिरात फलकांची दुरवस्था आणि उघड्या विद्युत तारांमुळे नागरिकांच्या सुरक्षिततेचा प्रश्न निर्माण झाला आहे. रौनक ॲडव्हर्टायझिंगच्या जाहिरात व्यवस्थेशी संबंधित असल्याचे सांगितले जाणारे काही फलक वाकलेल्या अवस्थेत असून, त्यांवरील विद्युत तारा उघड्या व अस्ताव्यस्त दिसत आहेत. या प्रकरणी शिवसेना (उद्धव बाळासाहेब ठाकरे) पक्षाचे खारघरचे माजी उपशहरप्रमुख नंदू वारुंगसे यांनी प्रशासनाकडे तातडीच्या कारवाईची मागणी केली आहे.
रस्त्याच्या दिशेने झुकलेले जाहिरात फलक कोसळल्यास वाहनचालक आणि पादचाऱ्यांच्या जीविताला धोका निर्माण होऊ शकतो. तसेच उघड्या विद्युत तारांमुळे अपघाताची शक्यता आहे. त्यामुळे संबंधित फलकांची संरचनात्मक व विद्युत तपासणी करून आवश्यक सुरक्षा उपाययोजना कराव्यात, अशी मागणी वारुंगसे यांनी केली आहे.
जाहिरात फलकांच्या परवानग्या, सुरक्षितता आणि देखभालीची तपासणी करून नियमांचे उल्लंघन आढळल्यास जबाबदारांवर कारवाई करावी. तसेच धोकादायक फलकांची तातडीने दुरुस्ती करावी किंवा आवश्यकतेनुसार ते हटवावेत, अशी मागणी शिवसेनेच्या वतीने करण्यात आली आहे.
