4k समाचार

उरण दि १(विठ्ठल ममताबादे )रायगड जिल्हा हौशी शरीर सौष्ठव संघटनेतील उरण येथील राष्ट्रीय शरीर सौष्ठवपटू प्रतिक प्रविण दर्णे याची निवड United World Sports Fitness Federation तर्फे थायलंडमधील पटाया येथे होणाऱ्या ‘मि. आशिया’ आणि ‘मि. वर्ल्ड’ या प्रतिष्ठीत जागतिक शरीरसौष्ठव स्पर्धांसाठी भारतीय संघात झाली आहे. ही स्पर्धा २७ ते २९ नोव्हेंबरदरम्यान होणार आहे. 

यापूर्वी प्रतिकने रायगड श्री’, ‘द्रोणगिरी श्री’ आणि ‘महाराष्ट्र कुमार’ हे किताब आपल्या नावावर केले असून, आता त्याचे लक्ष जागतिक पातळीवर भारताचे नाव उज्ज्वल करण्याचे आहे. उरण तालुक्यातील एका छोट्या खेड्यातून प्रगतीच्या पायऱ्या चढत प्रतिक आज जागतिक व्यासपीठावर पोहोचला आहे. आपल्या यशाचे श्रेय त्याने रायगड जिल्हा हौशी शरीर सौष्ठव संघटना, तसेच संतोष साखरे, जितेंद्र गुरव, ट्रेरेन्स फर्नाडिस आणि नंदकिशोर शिंदे यांना दिले आहे.

रायगड जिल्हा हौशी शरीरसौष्ठव संघटना ही महाराष्ट्र हौशी शरीर सौष्ठव संघटना व अमॅच्युअर बॉडी बिल्डिंग फेडरेशन ऑफ इंडिया यांच्याशी संलग्न असून, या संघटनांतर्फे दरवर्षी जिल्हा, राज्य व राष्ट्रीय स्तरावरील स्पर्धांमधून आंतरराष्ट्रीय स्पर्धांसाठी खेळाडूंची निवड केली जाते. प्रतिकच्या या आंतरराष्ट्रीय निवडीबद्दल रायगड जिल्ह्यासह उरण तालुक्यातून सर्वत्र कौतुकाची लाट उसळली असून,सर्वच क्षेत्रातून प्रतीक वर शुभेच्छा व अभिनंदनाचा वर्षाव होत आहे.त्याच्याकडून भारताला पदकाची अपेक्षा व्यक्त केली जात आहे.