4kNews कामोठे
पनवेल, दि. 25 (प्रतिनिधी) : कर्ज मंजूर करून देण्याचे आमिष दाखवून सर्वसामान्य नागरिकांची ऑनलाइन फसवणूक करणाऱ्या आंतरराज्यीय टोळीचा पनवेल शहर पोलिसांनी पर्दाफाश केला. करंजाडे परिसरातील एका फ्लॅटमध्ये सुरू असलेल्या कथित कॉल सेंटरवर छापा टाकून चार आरोपींना अटक करण्यात आली. त्यांच्याकडून सुमारे ३ लाख ९५ हजार ५०० रुपयांचा मुद्देमाल जप्त करण्यात आला.
पोलिसांना मिळालेल्या गोपनीय माहितीनुसार, आरोपी लॅपटॉप, मोबाईल आणि इंटरनेटच्या माध्यमातून नागरिकांशी संपर्क साधत होते. विविध फायनान्स कंपन्यांच्या नावाने बोलून कर्ज मंजूर करण्याचे आमिष दाखविले जात होते. त्यानंतर प्रोसेसिंग फी, विमा, होल्डिंग चार्ज, जीएसटी आदी कारणे सांगून ऑनलाइन पद्धतीने पैसे उकळले जात असल्याचे तपासात समोर आले.
माहितीच्या आधारे पनवेल शहर, सायबर पोलीस व कळंबोली पोलिसांच्या संयुक्त पथकाने २१ ऑगस्ट रोजी करंजाडे येथील निलगिरी अपार्टमेंटमधील एका फ्लॅटवर छापा टाकला. यावेळी विजय बाबू भंडारी (३६), तुषार अरुण पिंगळे (३४), रोहित रंगाप्पा गौडा (२१) आणि दर्शन उमाशंकर (२१) यांना ताब्यात घेण्यात आले.
पोलिसांनी आरोपींकडून तीन लॅपटॉप, १५ मोबाईल, विविध बँकांचे सात डेबिट कार्ड, ३१ सिमकार्ड, ७४ हजार ४०० रुपये रोख, हिशोबाच्या दोन वह्या, एक डायरी, वाय-फाय राउटर व नेटवर्क टर्मिनल डिव्हाइस असा मुद्देमाल जप्त केला आहे.
ही कारवाई पोलीस उपायुक्त रश्मी नांदेडकर आणि सहायक पोलीस आयुक्त मथुर भुजबळ यांच्या मार्गदर्शनाखाली वरिष्ठ पोलीस निरीक्षक बाळा कुंभार, पोलीस निरीक्षक शाकीर पटेल, अभिजीत अभंग तसेच पनवेल शहर, सायबर आणि कळंबोली पोलीस ठाण्याच्या पथकाने केली. प्रकरणाचा पुढील तपास सुरू आहे.
