4kNews कामोठे
अनियमित व कमी दाबाच्या पाणीपुरवठ्यामुळे नागरिक त्रस्त; तातडीने व्यवस्था सुधारण्याची मागणी
पनवेल, दि. ९ (वार्ताहर) : कळंबोली परिसरातील अनियमित व कमी दाबाच्या पाणीपुरवठ्यामुळे नागरिक त्रस्त झाले असून, याप्रश्नी शिवसेना (उद्धव बाळासाहेब ठाकरे) पक्षाने सिडको प्रशासनाविरोधात आक्रमक भूमिका घेतली आहे. पक्षाच्या पदाधिकाऱ्यांनी सिडको अधिकाऱ्यांची भेट घेऊन पाणीपुरवठा तातडीने सुरळीत करण्याची मागणी केली.
गेल्या काही दिवसांपासून कळंबोलीतील विविध भागांत कमी दाबाने व अनियमित पाणीपुरवठा होत असल्याने नागरिकांना दैनंदिन गरजांसाठी पाण्याची जुळवाजुळव करावी लागत आहे. आगामी सणांच्या पार्श्वभूमीवर पाण्याची मागणी वाढण्याची शक्यता असल्याने प्रशासनाने पाणीपुरवठा यंत्रणेची पाहणी करून आवश्यक दुरुस्ती व उपाययोजना कराव्यात, अशी मागणी करण्यात आली.
यावेळी शिवसेना कळंबोली शहर विभागप्रमुख विश्वास जगन्नाथ पेटकर, शहर संघटिका ज्योती राजेश मोहिते, उपशहर संघटिका निशाताई जाधव, विभाग संघटिका सुनीता चव्हाण, प्रभागप्रमुख महेश गुरव, विक्रम ठाकरे यांच्यासह पदाधिकारी उपस्थित होते. पाणीपुरवठा तातडीने सुरळीत न केल्यास रस्त्यावर उतरून तीव्र आंदोलन छेडण्याचा इशारा विश्वास पेटकर यांनी दिला.
